Press "Enter" to skip to content

Pyrshah ki jaidbynriew rit paid bym kynthup ha ka 6th Schedule

Shillong, Risaw 8 : Ki san tylli ki jaidbynriew rit paid ha ka jylla kiba ym shym shah kynthup ha ka Sixth Schedule jongka Riti Synshar jongka ri ki la dawa ba u myntri rangbah ka jylla u Conrad Sangma u dei ban shim khia na ka bynta jongki.
Kine ki san jaidbynriew rit paid ha ka jylla ki long ki Bodo, Kachari, Koch, Hajong, Mann bad Rabha.
ïa kitei ki san jaidbynriew la pynlong lang kawei kum ki ‘unreprented tribe’ ban ioh MDC shuh sieh na ki hapoh ki District Council.
Kane kan long ha baroh lai tylli ki district council kata ha Garo, Jaintia bd Khasi.
Lah ban pynkynmaw ba dang ha ka 26 tarik mynta u bnai ka Sub Committee halor ka jingpynkylla ïa ka Sixth Schedule ba la thung da ka sorkar ka la rai ban ai jingmut sha ka Standing Committee jongka Parliament ban weng noh ïa ka kyntien ‘unrepresented tribe’ na kane ka jingpynkhreh pynkhylla ïa ka Sixth Schedule.
Ka Meghalaya Hajong Welfare Association (MHWA) ka pynpaw ba kane ka jingthmu kan pynduh pyndam ïa ka jingmut riti synshar paidbah jongka ri. Ka Riti Synshar jong ka ri ka kren shai ba ka Sixth Schedule ka dei na ka bynta ki riewlum rit paid ( Schedule Tribe) hynrei kane  ka jingthmu ban wanrah ka jingpynkylla kan khniot beiñ ïa ki jaidbynriew rit paid ban ïoh bynta ha ki district council ong ka MHWA.
Ka MHWA ka pynpaw ba ka kren ïa kane na ka bynta kiwei ki jaidbynriew ruh kata kum ka Meghalaya Koch Association, Meghalaya Rabha Jatio Sewa Sangha, All Bodo Students Union, Bodo Sahitya Sabha, All Meghalaya Mann Welfare Society, Hajong Students’ Union bad All Rabha Students Union jongka Meghalaya.
Nalor kane ka MHWA ka buh jingkylli ruh hakhmat u myntri rangbah ba rim ka jylla uba dei unongïalam ka liang pyrshah mynta u Dr Mukul Sangma hato na ka Liang Pyrshah ruh ka ïa mynjur ne sngew ïahap jingmut bad kane ka jingthmu ban weng ïa ka kyntien ‘unrepresented tribe’ na ka jingpynkhreh pynkylla ïa ka Sixth Schedule.