Press "Enter" to skip to content

Sa tang 10 sngi ka elekshon ha Shella, thnem ka ïalap elekshon hapdeng ka Puja

Shillong, Risaw 08 : Ka elekshon shiteng samoi ha Shella constituency ka la sdang ban shongshit bha khamtam eh na ka bynta ki kyrtong kiba don por mynta sa tang kumba 10 sngi ei ei ban leit kylleng ki shnong ban pan jingkyrshan na ki paidbah.
Kaba kham shongshit eh kadei ha kine ki sngi ba ïoh shuti Puja ha kaba ki don ki kyrtong kiba pynlut lang ïa ka por jong ki bad ki paidbah ym tang ban rakhe ïa kitei ki sngi hynrei ruh ban ïalap elekshon.
Haba phai pat sha ka jingpynkhreh jong ki kyrtong, na ka liang ka UDP jan baroh ki nongïalam ba hakhmat jong ka party hapoh ka jingïalam jong u President, Bah Metbah Lyngdoh ba dei ruh u Lamphang jong ka Iing Dorbar Thawaiñ ka jylla ki la leit ban iuhkjat kylleng ki shnong kynthup ïa ki shnong kiba kyndong tam ban kyrpad na ki nongshong shnong ba ki dei ban pynjop ïa u khun rangbah jong u (L) Dr. Donkupar Roy, u Balajied Synrem kumba ki la pynjop ïa u kpa jong ki ha ki 7 sien lynter.
Kawei pat ka party kaba ki nongïalam jong ka party ki da leit ban pynlut por, kadei ka People’s  Democratic Front, ha kaba ym tang u President hynrei naduh ki MLA jong ka party ki la pynlut lang ïa ka por jong ki ban leit pan jingkyrshan na ki paidbah ryngkat ka jingkular ban pynkylla dur ïa ka Shella ha ka pule puthi, ka koit ka khiah bad kiwei kiwei.
Nalor kine, ka MDC na Nongshken kaba ieng kum ka kyrtong shimet, Kong Grace Kharpuri, nangta u kyrtong ka BJP, Bah Joshua Warjri, kyrtong ka Congress Bah Bantyngshaiñ Ryngnga bad ruh u Bah Komen Laitmon kyrtong shimet, ki ruh ki la ïaid kylleng ban pan jingkyrshan na ki paidbah, kata da kawei ka nongrim, ban wanrah ïa ka roi ka pa, ka jingkylla ha ki lynti syngkien bad ha kiba bun ki liang khamtam eh haba ïadei bad ka jingdawa distrik na ka bynta ka thaiñ Sohra – Shella kumba la maitphang da u kyrtong ka UDP.