Press "Enter" to skip to content

Yn ïoh pdiang ka India ïa ka liengsuiñ ïapom Rafale kaba nyngkong ha ka jingleit u Rajnath sha Paris

New Delhi :U Myntri ïada ri u Rajnath Singh hynnin ka sngi Nyngkong ula pynlong ïa ka jingleit jngoh ba lai sngi sha Paris ha kaba un ïoh pdiang ruh ïa kawei na ki 36 tylli ki liengsuiñ ïapom Rafale jet.
Katkum ka kaiphot u Rajnath Singh la ong ba baroh kila pynpaw ïa ka jingkmen ha kaba ïadei bad ka jingwanrah ïa katei ka liengsuiñ sha India bad ïa kaba yn pynrung hapoh ka tnat Indian Air Force.
“Baroh kila pynpaw ïa ka jingkmen ha kaba ïadei bad ka jingwan jong kine ki liengsuiñ sha India, phi dei ban peit ïa ka jingïalang,” ong u Rajnath.Shwa kane ka sngi hashwa ba un mih ban leit sha France, u Rajnath ula ong ba ula khmih shakhmat na ka bynta ban pynkhlaiñ shuh shuh ïa ka jingïadei bad ka France.
Ha kane ka jingleit ba lai sngi shapoh Paris, u Rajnath un ïashim bynta ruh ha ka jingïalang halor ki kam ïada ri bad ka jingïalang na ka bynta ka jingïoh pdiang ïa katei ka liengsuiñ. “Ka jingïadei ha ki kam khaïi pateng hapdeng ka India bad France kala nangkiew shakhmat naduh kine ki snem kiba la dep.Khmih lynti ban nangkyntiew shuh shuh ïa ka jingïadei,” pynpaw u Rajnath lyngba ka twitter.
Hadien ba la ïoh pdiang ïa katei ka liengsuin, u Singh un pynlong ïa ka lehniam ‘Shastra Puja’ (ka jingmane ïa ki tiar ialeh) kata ha ka jinglehniam Dussehra bad hadien un sa shong ruh hapoh kane ka liengsuiñ, ong ka khubor heh sorkar.
Kane ka jingïalang ban aiti ïa katei ka liengsuiñ Rafale jet kan long hapoh Dassault Aviation ha Merignac jong ka Bordeaux, kaba jngai kumba 590 km naParis.
Watla u Singh un ïoh pdiang ïa kane ka Rafale kaba nyngkong napeng ki 36 tylli kiwei pat, sa sawtylli kiwei pat kin wan poi sha India ha u bnai Jymmang jong u snem u ban wan.
Mynta ka sngi u Singh un aijingkren hapdeng ki CEO jong ki karkhana shna tiar thma ba pawkhmat jong ka France ha kaba un kyntu ruh ïa ki ban ïashim bynta lang ha kaba ïadei bad ki kam shna tiar thma ba la pynmih da ka India.Ka jingïadei halor ki kam ïada ri bad ka jingtreikam jong ki bor pahara hapdeng ka India bad France kala kiew stet bha naduh kine ki ar snem ba la leit noh.
U Myntri Rangbahduh Narendra Modi ula pynlong ka jingleit jngoh sha France ha une u bnai Nailar bala dep ha kaba baroh kine ki artylli ki ri kila shim ïa ka rai ban nang pynkhlaiñ shuh shuh ïa ka jingïadei ha ki kam ïada ri kaba kaba ju long ha ki por kiba la dep.
Ki tyllong khubor ki ïathuh ba ka kynhun na ka tnat shipai Indian Air Force kila don lypa ha France ban ïatreilang bad ki heh sorkar jong ka France ha kaba ïadei bad katei ka jingaiti ïa katei ka liengsuiñ.
Ka sorkar India kala ïasoi bad ka France ha u bnai Nailur 2016 na ka bynta ban pynïoh 36 tylli ki liengsuiñ ïapom Rafale ha ka dor kumba T.59,000 klur.Kine ki liengsuiñ kidei kiba lah ban kit ïa ki tiar ïaleh ba kongsan bad kumjuh ïa ki namding.
Na ka liang ka IAF kala dep lypa ïa baroh ki jingpynkhreh, kynthup ha kaba ïadei bad ki jingdonkam na ka bynta ka jingai jinghikai ïa ki pilot na ka bynta ban pdiang sngewbha ïa kitei ki liengsuiñ.
Ka tyllong khubor ka ïathuh ba ïa ki liengsuiñ kiban wan poi ha ka kylla kaba nyngkong ban wanrah ha Ambala air force station, ïa kaba la shim ba kadei kawei na ki ktem ba kongsan jong ka IAF.Ki bynta khappud ka India Pakistan ka jngai tang kumba 220 km na kane ka jaka.
ïa ki liengsuiñ Rafale ki ban wan poi hadien yn wanrah hapoh Hasimara base ha West Bengal.