Press "Enter" to skip to content

Bthah ka KHADC ïa ka Hima Nongstoiñ ban lum jingkheiñ ïa ki bar jylla ha Shahlang

Yn pyrkhing da ka Police Verification bad ka NRC

Shillong, Risaw, 11: Ka Khasi Hills Autonomous District Council (KHADC) mynta ka sngi Thohdieng ka la bthah ïa ka Ophis jong ka Hima Nongstoiñ ba kan lum jingkheiñ halor ka jingdon jong ki briew kiba nabar ka jylla kiba trei, kiba khaii bad kiba shong shnong hapoh ka thaiñ Shahlang, West Khasi Hills District kaba hap hapoh u pud u sam jong ka Hima Nongstoiñ.
Kane ka jingbthah jong ka tnat Market ka KHADC ïa ka Ophis jong u Syiem ka Hima Nongstoiñ ka long hadien ba ki lai tylli ki sengbhalang ka West Khasi Hills District kiba kynthup ïa ka Hynnñiewtrep Achik National Movement (HANM), ka Hynñiewtrep Youths Council (HYC) bad ka Western Youth Federation (WYF) ha ka 17 tarik u Nailur mynta u snem ki la phah da ka jingthoh sha ka District Council halor ka jingjyllei shaba palat ki bar jylla kiba bylla sngi, kiba khaii, kiba shong shnong ha ka thaiñ Shahlang.
U Executive Member jong ka tnat Market, u Bah Jambor War ha ka jingïakren bad ki lad pathai khubor mynta ka sngi thohdieng u la ïathuh ba u Syiem u la kubur ba ka dei kaba shisha ba ki bar jylla ki la jyllei shaba palat ha ka thaiñ Shalang.
“Katkum ka jinglum jingtip jong ka ophis jong ka Hima Nongstoiñ ki bar jylla kiba don hapoh ka thaiñ Shahlang ki dei kiba la im da ki phew snem,” la ong u Bah Jambor War bad ïathuh ruh ba ka Ophis jong ka Hima Nongstoiñ ka don ïa ka bor ban khanglad ïa ka jingwan buhai, khaii bad shong shnong jong ki briew kiba nabar ka jylla namarba ka aiñ Administration of Nongstoiñ Syiemship Rule 2006 No.8 sub-section 3 A and B ki kren shai ba ki bar jylla kim lah ban shong shnong hapoh u pud u sam jong ka Hima Nongstoiñ khlem da ïoh ïa ka jingmynjur da ka Dorbar Hima.
“Ngi la bynshet beit ha ka Ophis jong u Syiem ka Hima Nongstoiñ ban lum jingkheiñ ïa ka jingdon jong ki bar jylla ha ka thaiñ Shahlang bad ban ai jingkheiñ pat sha ka District Council. Ngi la bthah ruh ba ka Ophis u Syiem kan pan ïa ka Police Verification bad ïa ka National Register of Citizens (NRC) na ki bar jylla kiba shong shnong ha ka thaiñ Shahlang,” u la ong.
“Ki bar jylla kiba wan trei bylla kin hap ban ïoh ïa ka Labour Licence na ka tnat Labour bad kiba leh ïa ka khaii ka pateng kin hap ban ïoh da ka Trading Licence na ka tnat Trade jong ka District Council ,” u la ong bad bynrap, “kim lah ban shu bylla bad khaii be-aiñ hapoh u pud u sam jong ka District Council.”
“Ngi la bthah ruh ïa u Syiem bad ïa u Secretary jong ka Hima Nongstoiñ ba lada ki don kano kano ka jingeh ki dei ban pyntip sha ka District ha kaba ngin leh ïa kaba donkam,” u la ong.
Katkum ka jingïathuh jong u Bah Jambor, ka iew ha Shahlang kaba la peit bad khmih da ka Kur Songsak bad ka Kur Sohbar kaba jyllei da ki bar jylla ka dei ka iew be-aiñ namar katkum ka aiñ jong ka District Council yn ym lah ban seng ïa ka iew khlem da ïoh jingbit na ka District Council.
Katkum ka jingpyntip jong u Secretary ka Hima ha u EM ka tnat Market, kane ka iew ha Shahlang ka dei kaba la don la bun bun snem. “Ngi la bthah ïa ka Ophis jong ka Hima ba kan bthah ïa ka Market Committee jong ka Kur Songsak ba ka Kur Sohbar ba kin ïaid katkum ki kyndon,” la ong u Bah Jambor.
Katkum ka jingïathuh jong u Bah Jambor, u Rangbah Shnong ha Shahlang u dei na ka jaidbynriew Garo bad ha Nongshram pat la long Rangbah Shnong da u Lyngngam.