Press "Enter" to skip to content

Ha Lailad yn ai jinghikai kyrpang ka RBTEDF ïa ki paidbah ka Phra Shnong

Angnud pynkylla ‘Fish Sanctuary’ ïa ka Wah Umtrew

Nongpoh, Nailur 11: Kum kawei na ka seng kaba peit kyrpang na ka bynta ban ïada ïa ka mei mariang bad ruh ban kyntiew ïa ki kam jngohkai pyrthei ha Ri Bhoi District, ka Ri Bhoi Tourism and Environmental Development Forum (RBT&EDF) ka la rai ban pynlong syndon da ka jingïalang paidbah ha ka 25 tarik u Risaw ha Lailad na ka bynta ban pynsngewthuh sha ki paidbah jong ki Phra Shnong halor ka jingdonkam ban ïada ïa ka Mariang bad ki sawdong sawkun jong ka ha ka thaiñ Lailad ha Ri Bhoi District.
Kum ban pynpaw paidbah, ka jingdon ka wah Umtrew ha Lailad ka dei kawei na ka jingmyntoi jong ki paidbah ha katei ka thaiñ, namar ka jingdon ka Jingkieng Lailad bad ka Wah Umtrew ka la khring shibun ki paidbah ban leit ïuhkjat ha katei ka jaka bad ruh wat ki briew kiba namar ka jylla ki ju poi ban leit shang pyngngat sha katei ka jaka.
Haba ïa kren mynta ka sngi bad u Secrertary ka Forum, u Bah Marvelous Pde bad u Publicity Secretary, u Bah Wanphrang Sumer, ki la ong ba ka Forum ka la angnud la slem ban pynlong noh ïa ka Lailad kum kawei na ka jaka jngoh pyrthei ha Ri Bhoi bad ka jingdon ka Wah Umtrew bad ki Khlaw ba mar syndah bad ka Nongkhyllem Wildlife Sanctuary kan iarap shibun ba ka sorkar kan lah ban pynlong kum kata ka jaka jngohkai pyrthei ha Ri Bhoi District.
Kitei ki nongïalam ka Forum ki la ong ruh ba kum ka Forum ki la angnud la slem ban pynsgewthuh sha ki paidbah ba kin sumar ïa ka Wah Umtrew bad kumjuh ruh wat ki khlaw ki btap kiba don ha Lailad, namar kane ka dei kawei na ka bynta kaba ngi lah ban lah ban pynneh pynsah ïa ki dohkha dohpnad bad ki mrad ki mreng kiba don ha katei ka thain Lailad mar syndah bad ka khlaw kaba ka sorkar ka ai ka jingïada ïa ka mei mariang.
U Bah Pde u la ong ruh ba ka Forum ka angnud ruh ban pynkylla noh ïa ka Wah Umtrew ha ki bynta jong ka Lailad kum kata ka ‘Fish Sanctuary’ ha kaba ka thong ka long ban iada kyrpang ïa ki kynja dohumba kin nym duhjaid bad ruh ban khanglad na ka bynta ban pyniap pathar ïa ki dohum da kaba wieh dawai beain ne pynbthei bom ha katei ka wah.
“Dei halor ka jingangnud ban iada kyrpang ïa ka mariang bad khamtam katei ka wah Umtrew bad ki khlaw ki btap, ka Forum ka la rai ruh ban pynlong ka prokram kyrpang sha ki 8 tylli ki Shnong ba hap ha ka thaiñ Laillad kumba la dep buh tarik, ha kaba ka thong hi ka long ban sdang shuwa ka jingpynsngewthuh ïa ki paidbah nongshong shnong ba kin ioh kata ka mynsiem ieit mariang bad shisien ba ki paidbah ki la ai ka jingïasnoh kti lang kan long kaba suk ban iada kyrpang ïa ka wah Umtrew bad ruh ki khlaw ki btap kiba don ha ka thaiñ Lailad” u la ong bad bynrap ruh nangne shakhamt ka Forum ryngkat ki paidbah kin ïa trei lang na ka bynta ban iada ïa ki kynja dohum ha ka wah Umtrew bad ruh ki mrad ki mreng kiba don ha katei ka khlaw Lailad” u la bynrap.
U la bynrap ruh da kaba ong ba ka Forum ka kyrpad ruh ïa ki paidbah ka phra shnong ba kin wan shim bynta ha katei ka prokram ai jinghikai ka ban long ha ka 25 tarik u Risaw, khnang ba ha katei ka sngi kin ioh ban ïa kren halor shibun ki mat ba kongsan kumno ban ïada ïa ka wah Umtrew, ki khlaw ki btap bad khamtam ka jingangnud ban pynkylla noh ïa ka Lailad ku kawei na ka jaka jngohkai pyrthei ha Ri Bhoi District.
Shuh shuh, u la ong ruh ba ka Forum ka buh ruh ka jingkyrpad sha ka sorkar jylla ba kan sngap ïa ki jingangnud ka Forum ban pynkylla ïa ka Wah Umtrew ha Lailad kum ka Fish Sanctuary, namar lada lah ban sumar kyrpang ïa ki Dohkha kiba don ha katei ka wah kan kylla long shisha ka jaka kaba khring ïa ki nongjngohkai pyrthei bad bud pat sa ka jingmyntoi ki paidbah ban kyntiew ha ka liang ka ioh ka koit lyngba ka kam jngohkai pyrthei, u la bynrap shuh shuh.