Press "Enter" to skip to content

Hukum ka Sorkar ban talasi ïa ki Nongtrei ba thied tiar Online ha Secretariat

Shillong, Risaw 11: Ka Sorkar Jylla lyngba ka Tnad Secretariat Administration Department (SDA) kala pynmih ïa ka Circular ( Jingbthah) ba bthah ïa ki bor pahara jong ka Main Secretariat bad Additional Secretariat ba kim dei shuh ban shah ïa ki Nongtrei ba thied tiar Online ba kin rung shapoh ka Ophis khlem da talasi thikna ïa ki song.
Ïa kane ka jingbthah la pynmih da u C.P. Gotmare, Secretary ka Tnad SAD ha ka 1 tarik Risaw bad la phah copy ruh sha ka baroh ki Khlieh jong ki Tnad treikam ba don ha Secretariat ba kin pyntip ïala ki jong ki Nongtrei ba kin hap mad ïa ka jingshah talasi lada ki wanrah tiar ba thied Online shapoh ka Ophis.
Kat kum kane ka jingbthah, la ong ba ka Tnad SAD kala ïoh jingtip ba bun ki Nongtrei jong ka Main bad Additional Secretariat ki ju thied ïa ki tiar online bad ju pynrung ïa kine ki tiar khlem da talasi kaba lah ban pyndkoh ïa ka jingpahara bala buh bad buh jingma ïa ka Ophis.
“Namar ka Meghalaya Secretariat ka dei ka jaka ba pynjur ïa ka bor pahara, ka jingtalasi ïa ki tiar online ka long kaba donkam bha bad ym dei ban shah ïa kino kino ki song ba kin rung shapoh ka Ophis khlem da ïaid lyngba ki jingtalasi jong ki bor pahara” ong ka jingbthah.
La ong ba nangne shakhmat, baroh ki nongtrei kiba thied ïa ki tiar online lada ki rah shapoh ka Secretariat kin hap ban shah talasi ha ki bor pahara. La ai jingmut ruh ba ki nongtrei ki dei ban ai jingtip ïa ki jaka sah ban wanrah ïa ki tiar ba ki thied online nangne shakhmat.
Ïa kane ka jingbthah la phah copy sha ka Ophis u Myntri Rangbah ka Jylla, u Chief Secretary, sha u Deputy Inspector General of Police (SB), Superintendent of Police (VIS/ Security) Meghalaya bad kiwei kiwei kum ka jingpyntip.
La phah copy ruh sha u Security Incharge jong ka Main Secretariat bad Additional Secretariat ba kin bthah ïa ki bor pahara ba kin da talasi thikna ïa ki tiar online bad ba kin shah pynrung sha Ophistang ïa kito ki tiar bala dep talasi bha.