Press "Enter" to skip to content

Ïohlad ka Assam ban kyntur pud ba tlot ki bor synshar hima

Da ki Phew Kilometer la dep shah klun jaka

Nongstoiñ, Risaw 11: Ka jingeh kaba mih ha ki shnong ki thaw kiba don ha shilynter u pud bad ka jylla Assam, ka dei ka jingeh kaba la sdang naduh ba ka sorkar India ka la ai ïa kata ka Sub State kaba la jer da ka kyrteng kum ka Meghaloi ha ka ktien Bengali kaba mut ka ri jong ki lyoh.
Nalorkata, hadien ba ïa ki nongsynshar hima la ki dei ki Hima Syiem ne ki Hima Sirdarship, la pynïaid noh da ka Khasi Hills Autonomous District Council (KHADC), kumta ka jingsynshar ka la tlot bor haduh katta katta.
Ha West Khasi Hills District ki don lai tylli ki Sirdarship ba don ha khappud bad ka Assam, kine ki kynthup ïa ka Nonglang Sirdarship, ka Jyrngam Sirdarship bad ka Raidmynsaw Sirdarship kaba dang shu pynkha sirdarship thymmai ha u snem 2009. Nangta ar tylli ki hima Syiem ba kynthup ïa ka Rambrai Syiemship bad ka Nongkhlaw Syiemship kiba don ïa ki shnong kiba la shah klun ha ka Assam bad kiba don mynta ha ka jingbym sngew thikna lano kin lait na ki jingeh ba ki ïakynduh man ka por.
Ki jingeh ba ki paidbah kiba shong ha khappud ki ïakynduh, ka jur palat ha ki shnong kiba hap hapoh ka Nonglang Sirdarship ha kaba katei ka hima ka la shah klun ha ka Assam la palat lai kilomitar naduh Amagaon haduh ki bynta ba markhap bad ka Sildubi. Nalor kata ka Nonglang Sirdarship ka la duh ruh ïa ka ïew Gamrimura namar mynta la kam trai noh da ka sorkar Assam.
Ym tang ka hima Nonglang kaba shah knieh, hynrei ka Jyrngam Sirdarship ruh ka la shah knieh kumba shi kilomitar shiteng kata naduh jingkieng wah Tyrsung haduh khap shnong Umsaitwait. Hynrei ka jingdon jong ka Police Out Post ha Athiabari ka la ïarap shibun ha kaba ka Assam kam sngew dei shuh ban dang kyntur shuh shuh kham sha khmat.
Ka jingshah kyntur pud kaba bun tam ka dei ka Raidmynsaw Sirdarship kaba la shah knieh lut ïa ki jaka puta bad haba kheiñ antad ïa ka jing jngai naduh Kamphoduli haduh Mawsikar ka la kot haduh 26 kilomitar. Ha ka shnong Mawsikar, ka sorkar Assam ka la buh ïa ka ktem pulit naduh u snem 1979 bad ka dang don haduh kine ki sngi.
Ki ar tylli ki hima Syiem ka Rambrai bad ka Nongkhlaw, watla ki jaka kiba hap ha ka jingsynshar jong ki, kim pat da shah ktah haduh katta katta ha ka jingkyntur pud jong ka sorkar Assam. Hynrei ka jingwit jingwoh ka long kaba jur bha namar ka jingthmu jong ka sorkar Assam ban den biang ïa ka Wah Khri ha Kyrshai na ka bynta ban pynmih bor ding.
Ka jingwit kaba mih ka long namar ba ha ka jaka ba ka Brahmaputra Board kaba dei ka Company kaba thmu ban pyntrei ïa katei ka dam, sha phang mihngi harud katei ka wah ka don ka shnong Rajabala kaba hap ha ka Hima Nongkhlaw, katba sha sepngi bad shathie pat ki dei ki jaka kiba hap ha ka Hima Rambrai.
Kitei ki jingeh baroh kiba mih ha kitei ki jaka khappud ki pyni shai kdar ba ki bor synshar jong kitei ki hima la ki dei ki Sirdarship ne ki Syiemship kim don ïa ka iktiar kaba khlaiñ ha ka synshar khaddar bad lehse ka lah ban long ruh ba kim don ïa ki kot ki sla kiba pynthikna na kano ka bynta ka dei ka jaka kaba hap hapoh ka hima jong ki.
Nalor kata ki lai tylli ki Sirdarship ka Nonglang, Jyrngam bad ka Raidmynsaw ki dei ki jaka ba mynshuwa eh ki khot ïa ki, ki “British Area”. Kaba mut ki jaka kiba la kam trai da ki Phareng ha ka por ba ki dang synshar ïa ka Ri India baroh kawei.
Na ka bynta ban pynkut ïa ka jingeh ha kitei ki shnong khappud, kitei ki bor synshar hima ki la dei ban thaw ki lad ki lynti kumno ban pynthikna ïa u pud u sam jong ki hima jong ki ym tang ban shu kmen tohhoh ïa ka kam Sirdar ne Syiem, tang ban ïoh jingmyntoi shimet na ki jingmih ka hima. Hynrei ki dei ban sngewthuh ba ka jingïohnong jong ki shimet kam don jingmut lada ki khun ki raïot jong ki Hima kin im sohsat bad shah pyndik na ka por sha ka por ha ki bor sorkar jong ka Assam.