Press "Enter" to skip to content

Ki paid ka Shella Constituency ki don ka bynta ban wanrah jingkylla: Mosjo

Shillong, Risaw, 11: U kyrtong ka People’s Democratic Front (PDF) ha ka ilekshon jied nongmihkhmat shiteng samoi sha ka Ing Dorbar Thaw-aiñ ka jylla Meghalaya na Shella Constituency, u bah Mosjo R Wanswett, u la kyntu ia ki paidbah ban don ka jingskhem jingmut haba jied ia ki nongmihkhmat.
“I wei pa i wei na kiba la ioh ia ka hok thep vote ki don ka bor kaba khlain ban jied ia ki nongmihkhmat kiba don ka jingkit khlieh ban kyntiew ia ka Shella constituency ha ka roi ka par ha ki liang baroh”, la ong une u kyrtong ha ka jingialang pan jingkyrshan ha Elaka Sohbar.
“Kumta nga ruh nga wan hangne ban tyrwa ialade kum u kyrtong na ka bynta kane ka ilekshon bad nga kyntu ia ki paidbah nongshong shnong ban ai ia nga ka lad ban shim ia ka jingkit khlieh ban kit ia ka lyngkor na ka bynta jong phi u paidbah”, u la ong.
“Ngam wan ban kular ban leh da kumne kumtai hynrei tang kawei ka jingkular kata ban ai ka jing-shakri kaba bha ia phi ki paidbah kata ban kyntiew ia ka imlang sahlang ha ka lyngba ki surok kiba biang, ka pule puthi, ka koit ka khiah bad kiwei ki jingdon kam ki paidbah”, u la ong.
“Ki paidbah ki don ka bynta kaba khlain ban wanrah ka jing-kylla bad kumba phi tip u hynmen jong nga, u bah Leston Wanswett, uba la iakhun lai sien ia ka ilekshon MLA na kane ka Constituency, u la don ka thong ban wanrah ka jingkylla hynrei u khlem shah jied”, la ong u bah Mosjo.
“Mynta ka kynti nga la resaiñ na ka kam bad ryngkat ka jing-ai mynsiem ka ing ka sem bad ka jingkyrkhu na u hynmen hi nga wan ban tyrwa ialade bad lada phi ibit ia nga ba ngan long kum u MLA jong phi ngan pyntrei-kam bha ia ki jingthmu ban pynkylla bad kyntiew ia ka Shella constituency”, la ong shuh shuh une u kyrtong.
Da kaba pyn-kynmaw ba u hynmen um ju iehnoh ia la ki nongkyrshan bad ki paidbah ka Shella Constituency hi baroh kawei, u la ong, “Kumba u hynmen jong nga bad phi ki paidbah phi la ia trei lang da ka jingieid bad jingshaniah mynta ka kynti to ai ia nga ka jingkyrshan ba pura ba ngan lah ban kyntiew ia ka burom ka Shella constituency”.
Kiwei pat kiba la ai jingkren ban pan jingkyrshan na ka bynta u kyrtong ki kynthup ia u MLA ka Sohra constituency, u bah Gavin M Mylliem, u President bad Vice President ka PDF, u bah Ivanlumlang Marbaniang bad u bah James Ban Basaiawmoit, u Bah King Riang, u Bah Wanlang Ksing bad kiwei kiwei. Ia ka jingialang la pynïaid da u Acting Sordar ka Elaka Sohbar, u bah Iaishah Japang.