Press "Enter" to skip to content

Kut jingmut ka UDP ban pynïoh District Sohra ha u 2019

Shillong, Risaw 11: Ka United Democratic Party (UDP) hynne ka sngi thohdieng, kala kut jingmut ban pynthikna ba ka Sohra Civil Sub Division kan kiew kyrdan noh kum ka District ba pura hapoh ka mang tyngka jong une u snem ba mynta.
“U President bala khlad noh jong ngi u Dr Donkupar Roy ula pynthikna ba ka jingpynkha ïa ka District ba thymmai kan sa jia noh hapoh une u snem. U Dr Donkupar ula dep ruh ban ïakren ïa kane ka kam bad u Myntri Rangbah ka Jylla Conrad Kongkal Sangma” ong u Bah Titosstarwell Chyne, President ka UDP East Khasi Hills District.
Kat kum ka jingong jong u, ka UDP kala kut jingmut ban pynurlong noh ïa kane ka jingangnud bad jingdawa kaba la slem bha bad ka party kan sa peit la ka Sorkar ba mynta (Meghalaya Democratic Alliance (MDA) ka burom ne em ïa ka jingagnud jong u Nongïalam bala khlad noh jong ngi.
Ka UDP ka pynieng ïa u Khun u Dr Donkupar Roy u Bah Balajied Kupar Synrem ha ka elekshon MLA shiteng samoi ban wan jong ka Shella Constituency ban ïoh bat beit ïa kane ka Constituency.
Haba kylli, u Bah Titoss uba dei ruh u Executive Member ka KHADC ula ong ba ka Party kala pynkhreh bha ïa kane ka elekshon bad ka sngew skhem ba kan ïoh beit ïa ka jingjop.
“U President ka Party Bah Metbah Lyngdoh bad kiwei kiwei ki Nongïalam ki dang ïalap elekshon mynta hapoh ka Constituency ban pan ïa ka jingkyrshan ïa u kyrtong ka party” ula ong.
Nalor kane, ula kam ruh ba u Bah Balajied ruh ula nang ïoh mynsiem mynta da ka jingwan ban kyrshan jong ki briew ki bym ju kyrshan satia ïa u Kpa jong u. “Kane ka pyni ba ka UDP ka la nang khlaiñ hapoh ka Constituency”.
Une u President ka UDP East Khasi Hills ula ong ruh ba ka rai jong kiwei pat ki kyrtong ban ïakhun ïa ka elekshon kan long ka jingmyntoi khraw ïa ka UDP.