Press "Enter" to skip to content

Kyrpad ka KSU ïa ka MSPCB ban sangeh ka jingthmu pynlong Public Hearing ha Brichyrnot

Ba kwah pynheh ka Star Cement ïa ka par tih mawshun

Shillong, Risaw, 11: Ka Khasi Students Union (KSU) Narpuh Circle mynta ka sngi Thohdieng ka la pynpaw ïa ka jingpyrshah halor ka jingkwah jong ka Star Cement ban pynïar ïa ka par tih mawshun ha ka shnong Brichyrnot, East Jaiñtia Hills District da kaba ieng halor ka nongrim ba kane ka jaka tih mawshun ka don hajan jong ka Narpuh Wildlife Sanctuary kaba dang don kynrei bha ki mraw kiba im ha kane ka khlaw.
Ha ka dorkhas ba la phah mynta ka sngi sha u Member Secretary jong ka Meghalaya State Pollution Control Board (MSPCB), ka KSU ka la ong, “ngi pyrshah jur haduh katta katta ïa ka Star Cement ba kan pynïar ïa ka jingtih mawshun ha ka shnong Brichyrnot namarba ka jaka ba la thmu ban tih mawshun ka dei ka Khlaw kaba don hajan ka Narpuh Wildlife Sanctuary bad markhap bad ka Wah Lukha.”
Ha ka jingïakren bad ki lad pathai khubor mynta ka sngi Thohdieng u President ka Seng u Bah Kwilnis S. Suchiang, la ong, “lada ailad ïa kano kano ka Kompeni ban pynïar ïa ka jingtih mawshun kan wanrah ïa ka jingjulor ïa ka mariang, ïa ki dieng ki siej bad ïa ki mrad. Ym tang katta, kan ktah ruh haduh katta katta wat ïa ki jingthung jingtep bad ïa ki nongshong shnong kiba don ha kane ka thaiñ.:”
Kane ka jingpyrshah jong ka KSU ka dei ruh halor ka jingpynbna jong ka MSPCB ban pynlong ïa ka jingpynshai paidbah (Public Hearing) ha ka 19 tarik mynta u bnai ha ka shnong Brichyrnot.
“Ngi la wan ai da ka jingthoh sha u Member Secretary jong ka Meghalaya State Pollution Control Board bad ngi la kyntu ruh ba lada long kaba lah ka Board ka dei ban pynsangeh noh mardor ïa ka jingpynsngew paidbah,” u la ong bad ha kajuh ka por u la ïathuh ba ka jubab kaba u Member Secretary ka Meghalaya State Pollution Control Board u la ai ka long ba ka Board kan sa shim jingkheiñ katno ngut kiba pyrshah bad katno ngut kiba kyrshan ha ka sngi ba la pynlong ïa ka Public Hearing.
Katkum ka jingïathuh jong une u Nongïalam ka seng, ka jaka ba tyrwa da ka Star Cement ban khlong ïa u mawshun ka jngai tang kumba 500 mitar na ka Wah Lunar. “Lada ailad ban tih mawshun, khlempep ki jingthaw kiba im hapoh um kin shah ktah,” u la ong.
Ka Seng ka la kynnoh ruh ba ka jingpyntud jaboh jong ki Karkhana pynmih dewbilat sha ki Wah ka la ktah bha ïa ki dohum doh wah.
U la ïathuh ruh ba ka Narpuh Wildlife Sanctuary ka dei ka khlaw kaba dang don kynrei bha ki shrieh Hoolock Gibbon ha kaba kine ki jait mrad ki don tang ha ka Thaiñ Shatei Lammihngi. Kane ka khlaw ka dei ruh ka iing shong ingsah jong ki mrad ki mreng, ki sim ki doh, ki thapbalieh bapher bapher bad ki syntiew khlaw ba laiphew jait. “Kane ka khlaw ka dei kaba la pynbna ruh kum ka Eco-Sensitive Zone,” u la ong.
Ka Seng ka la pynpaw ruh ïa ka jingsngew lyngngoh kaba khraw halor ka jingkam jong ka Star Cement Ltd ba ka la ïoh ruh ïa ka Clearance Certficate na ka Ministry of Environtment Forest and Climate Change. “Kane ka dei tang ka buit shukor ïa ki paidbah jong ka thaiñ. Lada ailad ïa ka jingtih mawshun, ka Khlaw Narpuh kan syllen,” u la bynrap.
U Bah Kwilnis u la ïathuh ruh ba bun ki jaka ki la syllen, ki tyllong um ki la jahrngai, ka lyer ka la jaboh, ki jingthung jingtep ki la ïap na ka daw ka erbih kaba mih kaba na ki karkhana pynmih dewbilat ha East Jaiñtia Hills District.
Shuh shuh u la ong ba lada dang ailad shuh shuh ïa ki karkhana pynmih dewbilat ban tih mawshun, kan pynduhjait ruh ïa ki mrad bad ïa ki dawai kynbat kiba im ha ki khlaw barben jong Narpuh Wildlife Sanctuary.
Ha katei ka dorkhas sha ka MSPCB, ka KSU ka la pyntip ruh ba ym don satia wat tang kawei ruh ka Karkhana pynmih dewbilat kaba don ha ka thaiñ Narpuh kaba don ïa ka Effluent Treatment Plant (ETP) na ki jaka pynlang jaboh.
“Ka jingbym don ki jaka pynlang jaboh (ETP) ka la buh jingma haduh katta katta ka mariang namarba ki jaboh jabaiñ ba la pynmih da kine ki Karkhana ki ktah haduh katta katta ïa ka mariang.
U la ïathuh ruh ba ka Wah Lukha kaba don hajan jong kane ka jaka ba la tyrwa ban tih mawshun ka dei lypa kaba la shah pynjngut bad lada ailad ban pynïar ïa ka shlem tih mawshun kane ka Wah kan nang shah pynjngut shuh shuh.