Press "Enter" to skip to content

Lada bakla, ki khun kin mad biang ïa kijuh ki jingeh ba phi la kynduh : Kong Grace

Shillong, Risaw 11 : Ka kyrtong shimet ba aireng ha kane ka elekshon shiteng samoi na Shella constituency, Kong Grace Kharpuri ka la kyntu ïa ki nongshong shnong ka Dalia,Umkhabaw bad Kalatek ban ai ka jingkyrshan kaba pura ïa ka ha kane ka elekshon jied nongmihkhmat kaban sa long shen ha ka 21tarik mynta u bnai lada ki kwah ban ïohi noh ka jingkylla kaba ki khlem ïohi ha kine ki 31 snem.
Ka Kong Grace kaba dei tang ma ka ka kynthei ba aireng ha kane ka elekshon shiteng samoi ka la ong, “La 31 snem phim pat ïoh ka umbam umdih ba biang, ka bording ruh ym don, ki jaka pule bad wat ki surok kiba bha ruh ym don. Paidbah da pyrkhat arsien bad da bishar bniah haba phi jied ïa ki nongmihkhmat, wat pyrkhat tang ïalade hynrei pyrkhat ruh ïa ka lawei ki khun ki kti,” ka la ong.
Nalorkata ka ong ruh ba kum ki nongthep vote ki dei ban kyndit bynriew noh naduh kane ka elekshon shiteng samoi khnang ba ka thaiñ kan ym bteng ban sahdien ha baroh ki liang.Katei ka kyrtong ka ong ruh ba ka jingsahdien kam dein tang ha ka shnong jong ki hynrei hynrei ha baroh kawei ka constituency ym don satia ki kam pynroi.
“Mynta ka kynti ailad bad jied noh da ka longkmie ban trei bad wanrah ïa ki kam pynroi ha ka constituency. Ka thong jongnga hi ka long ban trei bad shakri ïa ki paidbah ka constituency bad ban weng noh ïa ka jingsah dien kaba la synshar ïa kane ka thaiñ,” ka la bynrap biang.
Ka la ong ruh ba mynta sah sa tang 10 sngi ba ki paidbah kin jied ïano kin phah sha Assembly kum MLA ba thymmai. Ka la ïathuh ruh ba kum ka nongmihkhmat ba la jop lai sien kum ka MDC ka la ïohi lut jingsahdien ka thaiñ.
“Man ki shnong ba nga leit, nga ïohi ba baroh ki sahdien lut. Kumta, kaei phin rai. Congress la ju ïakhun ym ju jop, PDF la ju ïakhun u ruh um jop bad UDP la 31 snem jop khlem wanrah kam pynroi eiei. Ha u 2013 nga wan ïakhun hynrei ha kato ka por ngam pat ithuh ïano ïano ruh. Mynta ïa nga baroh ki party ki wan kyrshan, kynthup naduh NPP, UDP, BJP bad Congress namar ki suk ba nga dei ka kyrtong shimet,” ka la ong.
Shuh shuh ka ong ruh ba ka long kaba i synei ban ïohi ba ym don eiei satia ha baroh ki liang ha jan baroh ki shnong hynrei ki paidbah pat ki sngap jar. Kumta ka la kyntu ba mynta ka kynti ki dei ban rai rangbah lyngba ka vote ba kordor jong ki.
“Wat lehkai ïa ka vote jongphi namar kadei ka rai na ka bynta ka lawei jongphi shisien ba la bakla hadien bun snem phin lah ban pynbeit ïa ka,” ka la ong da kaba bynrap ba ka jingjied ïa ka “roller” kadei namar ba ka kwah ban pynbha noh ïa ki surok khohruh khohram, ban pynbha ïa ki iing ki sem, ki jaka pule, ki jaka ai jingsumar bad ha baroh ki liang.
Lah ban kdew hangne ba ka elekshon jied nongmihkhmat thymmai na ka bynta ka Shella kan long ha ka 21tarik mynta u bnai haba ki don baroh haduh 6ngut ki kyrtong.