Press "Enter" to skip to content

Plie u MP Shillong ïa ka lyngkhuh 60 snem ka Marian Hill H/SS

Jowai, Risaw, 11: U MP jong ka Shillong Seat u ma Vincent H. Pala ula wan ban plie pyrda ïa ka jingrakhe dap 60 snem ka jingïaid lynti ka skul Marian Hill Higher Secondary School, Jowai ha ka sngi Thohdieng.
Kane ka skul kadei kaba la seng da ka Balang Khatolik, Jowai naduh u Lber 1, 1960 da u (L) Fr. Tognocchi bad u (L) Fr. Henry Fantin kiba ïohi jngai na ka bynta ban kyntiew ïa ka pule puthi ka sor Jowai kaba dang duna bha ki skul.
Ha kine ki 60 snem ka jingïaid lynti jong ka skul ka la sei shibun ki khlur kiba la long ki myntoi jong ka imlang ka sahlang.
Nalor u MP ka Shillong uba long kum u kongsan la ïadonlang u PK. Boro, MCS Additional Deputy Commissioner, West Jaintia Hills District, ka Kong Diwbitis Khongiong District School Education Officer (DSEO), West Jaintia Hills District, u Fr. H Lamare Vicar General, Fr. Lawrence Paswet Principal Marianhill Higher Secondary School, ki kmie ki kpa, ki nonghikai, ki khynnah skul bad ki samla pule kiba la dep pass na kane ka skul.
U ma Pala kum ka dak ban plie ïa kane ka jingrakhe jubili ka skul ula pynher ïa ka lama jong ka Diamond Jubilee bad ula pynkup burom ruh ïa u Kyrmen Hemiat Rymbui uba la wan ha ka kyrdan kaba 14th ha ka result SSLC kaba pynïaid da ka MBoSE jong une u snem.
Haba kren kum u kongsan u ma Pala ula ïaroh ïa ki bor pynïaid ka skul naduh mynshuwa haduh mynta, ki nonghikai kiba la ai ka jingshakri na ka bynta ban saiñ dur ïa ka pule ka puthi jong ki khynnah ha kine ki 60 snem ka jingïaid lynti ka skul.
“Kane ka skul kadei kawei na ki skul kiba paw ha ka district bad kala sei shibun ki riewkhraw kiba la long ki myntoi jong ka imlang ka sahlang,” la ong u ma VH Pala bad ula kyntu ïa ki khynnah ban pynleit jingmut ha ka jingim pule puthi bad ban kiar na ki jingmlien ba sniew ban jop ha ka jingim.
U Ma Vincent ula kular ruh ban iatreilang bad ka bor pynïaid ka skul na ka bynta ban pynbiang ïa ki jingdonkam ban pynbha ïa ka jingsam jingnang jingstad.
La pynphuh pynphieng ïa kane ka sngi da ki jingrwai jingshad ba la iashim bynta da ki khynnah skul.