Press "Enter" to skip to content

Shah mudui u Acting Syiem Hima Nongspung ha ki Lyngdoh

Kynnoh ba lum pisa be-aiñ, ba soi thok kyrteng

Shillong, Risaw 11 : San ngut ki Lyngdoh jong ka Hima Nongspung kila ai da ka jingujor sha ka Khasi Hills Autonomous District Council (KHADC) bad sha ki Bor Sorkar, kaba long pyrshah ïa u Acting Syiem ka Hima halor ki jingkynnoh ba u donkti ban lum pisa be-aiñ bad ban soi thok ïa ka kyrteng ki Lyngdoh ban mynjur ïa ka Executive Committee jong ka Dorbar.
Kine ki san Lyngdoh ka Hima kila buh ïa kane ka jingujor hakhmat ka Deputy Commissioner bad ka Superintendent of Police ka East Khasi Hills haba dawa ruh ba dei ban kem mardor ïa une u Acting Syiem u Bah Kyntiewborlang Syiemlieh uba dei na ka Shnong Mawkneng.
Ki san ngut ki Lyngdoh kiba buh ïa kane ka jingujor ki dei u Bah Swending Lyngdoh, Lyngdoh Nongspung, u Bah Phestinejohn Myrthong, Lyngdoh Umlangmar, u Bah H Rosiland Jywa, Lyngdoh Lawkhla, u Bah Orestar Lyngdoh, Lyngdoh ka Raid Lyngkhoi bad u BAh Ingdaron Wahlang Lyngdoh Mawsya.
Kine ki Lyngdoh kila buh nyngkong eh ïa ka jingujor hakhmat u Chief Executive Member (CEM) ka KHADC bad Dy CEM myn ha ka 16/08/2019 ba dawa ïa ka Council ba kan pynduh noh ïa ka jingmynjur ïa ki Dkhot ka Executive Committee jong ka Dorbar Nongpung ba thymmai namar ka jingkynnoh ba une u Acting Syiem ula soi thok ïa ka kyrteng jong ki. Ki ïathuh ba u Acting Syiem ula lum ïa ka Dorbar Hima ha ka 03/08/2019 bad ula thaw ïa ka Executive Committee jong ka Dorbar Hima khlem ma ki hynrei ïa ki kyrteng jong ki, la kynthup lang bad la pynsoi tuh.
“Kane ka jingleh u Acting Syiem ka dei kaba be-aiñ bad kaba pyrshah ïa ka Riti ka Dustur bad ka rukom pynïaid jong ka Executive Dorbar jong ka Hima” ong kine ki san Lyngdoh ha ka jingujor sha KHADC.
Ha ka 19 /08/2019, kine ki Lyngdoh kila leit buh ïa ka jingujor sa hakhmat ka Deputy Commissioner ka East Khasi Hills bad ha kane ka jingujor la kynnoh ba une u Acting Syiem ula donkti ha ka jinglum pisa be-aiñ kum ka bai musur jongka Hima kaba jia ha ka 17 tarik Nailar ha ka shnong Mawkneng.
Kine ki Lyngdoh kila pyntip ruh ïa ka jingujor ba kila buh hakhmat ka KHADC haba dawa ban leh da kaba tyngeh ïa une u Acting Syiem.
Sa kawei pat ka jingujor la buh hakhmat ka Superintendent of Police ka East Khasi Hills halor ka jingkynnoh ba u pynsoi tuh ïa ka kyrteng jong ki ha ka jingthung ïa ka Executive Committee jong ka Dorbar Hima.
La kynnoh ruh ba u Acting Syiem ula pynsangeh jubor ïa ka jinglum musur ha ka shnong Mawjongka khlem ka jingtip jong ki Lyngdoh bad ka jingsam notice ba byrngem byrsit da ki ktiem ki bym iahap ha ka imlang sahlang. Halor kine, kila dawa ban kem mardor ïa une u Acting Syiem haba pyntip ruh ba u dei u briew uba la donteng ïa ka case ha ka tnad Pulit.