Press "Enter" to skip to content

Ïakynduh u Conrad ïa u Modi ban pynkynmaw ïa ka song ïarap

New Delhi: U Myntri Rangbah ka jylla, u Conrad Sangma, ha ka sngi ba ar, u la ïakynduh ïa u Myntri Rangbah duh ka ri, u Narendra Modi ban pynkynmaw ïa ka song jingïarap kaba la poi shaduh ki hajar klur ba ka sorkar jylla ka ladep ban ai naduh ki bnai baladep.
Ka Khubor ba la pyllait da ka Chief Minister Office (CMO) ka ïathuh ba ki projek ba la tyrwa da ka Meghalaya ban ïoh jingïarap pisa na ka sorkar kmie ki kynthup ïa ka National Games ba ka Meghalaya kan pdiang ban pynlong ha u snem 2022. Nangta ka jingtei ïa ka ïingdorbar ba thymmai jong ka jylla ha Mawdiangdiang bad kiwei kiwei pat ki jingïarap pisa na ka bynta ki kam pynroi bapher bapher ha ka jylla.
U Myntri Rangbah, uba la ïalam lang bad ka khun nyngkong jong u, ka Amara Sangma, kaba leit shong Class III ha Sankriti School, Delhi, u la khot sngewbha ruh ïa u Modi ban wan sha Meghalaya na ka bynta ka Water Conference bad ban pynsdang ruh ïa ka Piggery Mission bad ban plie ïa ka ïing ba pura jong ka National Institute of Fashion Technology (NIFT) Shillong.
Ha kajuh ka sngi, u Myntri Rangbah u la ïakynduh ruh ïa u Myntri ka tnad Minority Affairs, u Mukhtar Abbas Naqvi ban pynkynmaw halor ki jingtyrwa ka sorkar Meghalaya ban ïarap na ka liang kane ka tnad treikam jong ka sorkar pdeng ïa ka Sradium, nangta ki skul bad kiwei kiwei.
Ka jingpyllait khubor ka ong ruh ka ong ruh ba kane ka tnad treikam ka la pynkylla ïa ka rukom treikam bad kata ka long ba ym tang ba kan bei tyngka ban pynkha ïa ki District thymmai, hynrei kan ïarap ruh na ka bynta ban pynbiang ïa ki District kiba dang duna.
Kumjuh ruh u Myntri Rangbah ryngkat u Myntri kam pohïing ka jylla u James Sangma, ki la ïakynduh ïa u Myntri kam pohïing ka ri India, u Amit Shah ban ïakren bad u halor ka CAB bad na ka liang jong u Shah, u la kular ban da ïakren bad kiwei de kiba don bynta ha shuwa ban wanrah biang ïa kane ka Bill.
Ha ka jingïakynduh bad u Rajnath Singh, Myntri kam ïada ri ka ri India, u Conrad u la 9akren halor ka jingpynïoh jaka na ki shipai na ka bynta ban pynheh ïa ka surok na Shillong sha Guwahati.