Press "Enter" to skip to content

Pyndep ka Sankidaroi Sajem ïa ka Blind Football Referee

Shillong, Risaw 22: Ka long ka jingsngew sarong ïa ka Jylla Meghalaya bad khamtam ïa ka kynhun ïalehkai phutbol hapoh ka Jylla ban tip ba kawei na ki kynthei napoh ka Jylla ka la lah ban pyndep ïa ka jingshah ai jinghikai ha ka lynnong jong ki referee ki ban pynïaid na ka bynta ka jingïalehkai phutbol jong kiba matlah (Blind Football Referee Training Course).
Kane kadei ka Kong Sankidaroi Sajem ka ba la leit ban ïashimbynta ha ka jingshah ai jinghikai na ka bynta ka kam referee ka ba la long ha Pattaya,Thailand naduh ka 27 haduh ka 28 tarik U Nailur 2019 ka ba la pynïaid da ka International Blind Sports Association bad ka ba la neh haduh ka 7 tarik mynta u Bnai Risaw.
Ka Sankidaroi Sajem ka la sdang ban pynleit jingmut ban ïashim bynta ha ka lympung ïalehkai phutbol jong kiba matlah naduh ka lympung ïalehkai ka ba la tip ki ka 3rd North East Blind Football Tournament ka ba la long hangne ha Nongbah Shillong ha u Bnai Kyllalyngkot, kumta na ka liang ka Meghalaya Football Association (MFA) ka la pynpaw ka jingsngewkmen bad ai ka jingkyrshan na ka bynta jong ka kumba ka la thrang ban ïashim bynta ha katei ka jingïalehkai.
Ka Sankidaroi ka la long coach bad manager ïa ki ar tylli ki kynhun ïalehkai phutbol jong ki kynthei hapoh ka Jylla (Girls’&Womens’ team) bad long ruh kum ka official jong ka Meghalaya Baby League.