Press "Enter" to skip to content

Ai jinghikai ka KVK ïa ki nongrep ka WJH ban pyndonkam da ka sboh bym ktah ïa ka koit ka khiah

Jowai, Risaw 22: Ka Krishi Vigyan, West Jaintia Hills District ka la pynlong ïa ka jingai jinghikai ïa ki paidbah nongrep halor ka jingpyndonkam ïa ki sboh ha ka sngi ba ar kaba ka la sdang ïa ka Fertilizer Application Awareness kaba la plie paidbah da u Union Minister of Agriculture, Shri Narendro Singh Tomar.
Ha kane ka sngi u Brightstar Chyrmang MDC Jowai North ula long kum u kongsan bad ka tnad KVK ka la pyni paidbah ha ka pyrda ïa ka jingkren u Union Minister halor kane ka jingai jinghikai ïa ki paidbah nongrep halor ka rukom ai sboh kaba ktah ïa ka khyndew.
Ïa ka jingialang la pynlong ha Vincent Hall kaba don ha Lumbihsyntu ha ka jingïalang kaba pynïaid da ka Kong RW. Rangad SMS (Plant Protection).
U Dr. D Paswet Senior Scientist & Head KVK, Jaintia Hills ha ka jingkren maitphang ula ong ka sorkar mynta ka la pynshlur ïa baroh ki nongrep ban rep khlem pyndonkam ïa ki sboh dawai bad ka la pynshlur ban rep da ki sboh kiba ïoh na ki jingthung, ki sboh wieh, sboh ba ioh na ki jingri jingdup bad kiwei kiwei.
U Dr. Paswet ula ong ba ka jingpyndonkam ïa ki sboh dawai ka la ktah ïa ka koit ka khiah jong ka khyndew bad ki um ki wah kumjuh ïak koit ka khiah u briew. Kumta ka sorkar lyngba ka tnad kam rep ka riang ka la pynshlur ïa baroh ki nongrep ha ka ri ban pyndonkam ïa ki sboh ba ïoh na ki jngthung jingtep, sboh wieh, na ki jingri khnang ba kan ym ktah ïa ka khyndew bad ka jingseisoh jong ka.
La hikai ruh ïa ki nongrep ban pynthikna ban leh ïa ka test ïa ka khyndew ban ïoh ïa ka Soil Health Card, khnang ba kin ïohj jingtip ba thikna ïa ka jingdonkam sboh ka khyndew kaba rep ne thung jingthung.
U Ma Brightstar Chyrmang ha ka jingkren kum u kongsan ula kyntu ïa ki nongrep ban pyndonkam hok ïa kaei kaba ki la ïoh jinghikai ha kaba ïadei bad ka sboh khnang ba ki jingthung jingtep kiba ngi pyndonkam ha kaban bam kinlong kiba khuid kiba suba.
Ula pynshlur ïa ki nongrep ban rep bunjait ban pyndap ïa ka jingdonkam jong u nongshong shnong da kaba bud ryntih ïa ki buit ban iada iaka khyndew bad ki jingthung jingtep.
Kiwei kiwei kiba ai jinghikai ki dei ka kong L. Lakiang Project Director, ATMA, West Jaiñtia Hills, ka Kong R.Lyngdoh SMS (Agronomy), KVK Jaiñtia Hills kaba la kren halor ka phang Integrated Nutrient Management, u Remedy Lamare Scientific Officer DLRS&L, West Jaiñtia Hills halor ka Principles & Method of Fertilizer Application bad ka Kong Banylla Kharbamon, SMS (Horticulture) KVK Jaiñtia Hills kaba batai halor ka phang Promotion of Community Owned Farm involving Agriculture & Horticulture crops.
La ioh ruh ka jingkren na u Fr. Manbha Pakem, Director Jaiñtia Hills Development Society, Lumbihsyntu.
Kane ka jingai jinghikai da ka Krishi Vigyan, West Jaintia Hills District ka la ai jingmyntoi shikatdei eh ia ki nongrep jong ka District kiba dang im ha ka rep ka riang ban pyndap ia ka iing ka sem da ka kam rep bad nalor kiwei kiwei ki kam ba ki ju trei manla ka sngi.