Press "Enter" to skip to content

Kular u CM ha ka CoMSO ban lum ïa ki Myntri Sorkar halor ka ILP

Shillong, Risaw 23 : U Myntri Rangbah ka Jylla, Conrad K Sangma ha ka sngi Balang u la kular ha khmat ki nongïalam jong ka CoMSO ba un sa lum noh ïa ka jingïalang jong ka kynhun myntri ha kine ki khyndiat sngi ban wan ban ïa kren halor ki mat jingdawa jong ka kynhun ban pynrung ïa ki kyndon jong ka Inner Line Permit ha ka Amendment jong ka Meghalaya Residents Safety and Security Act.
Katkum ka kyrwoh ba la phah da u Secretary ka CoMSO, Bah Roy Kupar Synrem la ong ba ha katei ka jingleit buddien jong ka seng ïa kitei ki mat jingdawa, na ka liang u Myntri Rangbah hi u la kren shai ba ka sorkar jylla hi ka don ka jingthmu kaba skhem ban wanrah noh ïa ka Amendment ha shwa ka Dorbar ban wan jong ka Parliament.
La ïathuh ruh ba ha katei ka jingkynduh, ka kynhun ka la pynpaw ha khmat u Myntri Rangbah ba ka sorkar pdeng kan wanrah ïa ka Citizenship Amendment Bill ha ka sien shong dorbar kaban sdang naduh ka 18tarik u Naiwieng kumba la pynpaw da u President ka BJP bad Myntri Kampohïing ka sorkar pdeng, u Amit Shah. “Ka CAB kan don ïa ki kyndon ban ïada ïa ki jylla ba don ïa ka ILP bad kumba ka long, kum ka jylla ngi la donkam kyrkieh ïa ka Amendment jong ka MRSSA ha shuwa ba ka sorkar pdeng kan wanrah ïa ka CAB. Kumba ka long mynta ka por ka lah long kyrkieh bad donkam palat ban wanrah noh ïa ka aiñ ILP ha ka jylla ka jing ngi,” ong ka kyrwoh.
Ka CoMSO ka ong ruh ba ka jingkynduh ha katei ka sngi ka long ruh ban pynkynmaw ïa u Myntri Rangbah ka Jylla halor
ki jingkular jong u ha ki jingïalang kiba la dep.
“Na ka liang ka kynhun kan ap bad burom ïa ka jingkular jong u Myntri Rangbah ka Jylla bad ngeit skhem ruh ba ka Sorkar kan sa leh kloi ban pyndep ïa kane ka kam. Ka CoMSO kan sa shong pyrkhat ha kine ki sngi halor ki prokram bapher bapher ba ngin sa leh lada jia ba ka sorkar kam pyni ïa ki dak ba ka don shisha ïa ka jingthmu ban leh ïa kane ka jingdawa jong ngi,” bynrap biang ka kyrwoh.