Press "Enter" to skip to content

Kyndit u Myntri Health Deptt ba shah khang tala ka Tynhiang Sub Centre, dawa ka HANM ban kyntiew ïa ka Riangdo CHC

Nongstoiñ, Risaw 23: Ka Hynñiewtrep Achik National Movement Mawshynrut Circle hapoh ka jingïalam jong u President Bah Shem Rynñiaw, ha ka sngi ba ar jong ka taiew ka la leit ban ïakynduh markhmat bad u Myntri ka sorkar jylla u ba dei peit ïa ka tnad ka koit ka khiah.
Ka jingleit ïakynduh bad ai shithi jingdawa, ka dei halor ka jingdonkam kyrkieh jong ka Riangdo CHC ban kyntiew kyrdan, namar kumba ka long mynta kam lah lane kot bor shuh ban shakri ïa ki paidbah jong ka thaiñ Mawshynrut baroh kawei.
Ki nongïalam jong ka seng ki la pynpaw ruh halor ka jingbym don GNM hapoh Umshynrut Sub center, haduh ba ka la wanrah jingeh hadu katta katta ïa katei ka jaka sumar ban shakri ïa ki paidbah.
Ki la pynpaw ruh halor ka jingshah khang tala noh jong ka Tynhiang Sub center ha u trai khyndew ba shna ïa ka Sub Centre, namar la shu weng kam kyndit ïa u. Na ka lïing u Bah A.L Hek, u la pynpaw ïa ka jingsngew kyndit halor kane ka bynta bad u la kular ban sa tuklar ïa kane ka kam. Nangta u la kren shai ruh ba un sa bthah ïa ki ba dei peit ban plie noh.
Ha kaba ïadei bad ka jingdawa ban thaw post thymmai ha jaka jong u Dr.Erich Wanniang u ba la shim shuti (study leave) haduh lai snem, na ka liang u Myntri u la pynpaw ïa ka jingkyrduh ne duna Doctor hapoh ka jylla baroh kawei. Hynrei watla katta ruh u la kular ba un sa thaw lad halor kane ka bynta.
Katba ha ka jingïadei bad ka Riangdo CHC, u la pynshai ba ïa kaba mynta ym pat lah ban kyntiew kyrdan ïa ka CHC Sha ka Civil Hospital. Ïa kane ka kam u la ong lah ban leh tad ynda la ibit ka ophis jong ka CS bad ka DHS.