Press "Enter" to skip to content

Kynjah slam ka ïew CTS Memorial Hat ha Nongpoh ha ka sngi leit ontep ïa u Most Rev. Dominic Jala

Nongpoh, Risaw 23: Ka ïew CTS Memorial Hat lane ba la tip kum ka ïew step kaba hap ha u pud u sam ka Shnong Mawroh ha Nongpoh mynta ka sngi ka la kynjah hi slam, ha kaba baroh ki nongshong dukan ki la khang khyrdep da ka mon sngewbha kum ka jingburom ïa ka jingleh burom khatduh ïa ka met jong u Most Rev. Dominic Jala ba la tep don burom noh mynta ka sngi ha phylla ka ïingmanebah Cathedral Parish Laitumkhrah ha Nongbah Shillong.
Ha ka jingleit jurip u Nongthoh khubor u Mawphor mynta ka sngi ïa katei ka ïew la lap baroh ki dukan ki la khang khyrdep bad ym don shuh iwei ruh ba shong dukan bad haba pyrshang ban wad jingtip kaba bniah ka jubab ba la ioh ka dei ka jingburom ïa u Most Rev. Dominic Jala kaba ki pynpaw sha ka pyrthei ba ki ïasnoh kti lang kum ka jingleh burom khatduh ha ka jingleit ontep noh ïa u mynta ka sngi ha Shillong.
Lah ban ong ba ha kane ka ïew, ym dei tang ki riewngeit jong ka Balang Katholik kiba shong dukan bad la la khleh lang baroh ki jaid niam kynthup ruh ki Hindu bad kum ka jingburom pat ïa u Archbishop ka jylla niambah Shillong ki la ïa snoh kti lang ban pynpaw ïa kata ka jingduhnong kaba khraw halor ka jingduh noh ïa une u nongialam ba radbah ka Balang Katholik ba la tep don burom noh mynta ka sngi.
Haba ïa kren bad u Nongthoh khubor u Mawphor, u Bah C.B Syiem, uba dei u trai jong katei ka ïew bad ruh kum u President ka Seng Longkpa jong ka Parish Nongpoh, u la ïathuh ba kane ka jingkhang khyrdep ha kane ka sngi ba la leit ontep ïa ka met u Archbishop Dominic Jala ka dei hi kaba la shim rai lang da baroh ki nongshong dukan lyngba ka Committee jong ka iew kum ka jingburom halor ka jinglehniam khatduh bad tep don burom ïa u Most Rev. Dominic Jala.
U la ong ruh ba ka jingkhang ïa ki dukan kam dei satia kano kano ka jingpynbor da ka Committee lane ka bor Shnong bad kum ka jingburom ïa u Most Rev. Dominic Jala la shim rai lang naduh ka bor shnong, ka Committe jong ka ïew bad ki nongshong dukan ban ïa khang shi sngi ïa ki dukan ha kane ka sngi ba la leit ontep ïa ka met jong u Archbisop Dominic Jala kum ka jingburom ïa une u nongïalam niam uba la noh synniang ym tang ïa ka Balang Katholik bad uba la noh ruh ïa u synñiang u bynhei na ka bynta ka bha ka mait bad ka roi ka par jong ka imlang ka sahlang.
Namarkata, kum u trai jong katei ka ïew u Bah C.B Syiem u la pynpaw ruh ka jingsngewnguh sha baroh ki nongshong dukan kiba la ia soh kti lang ha kane ka sngi bad u ai ruh ka jingkhublei kaba kyrpang ïa ki nongshong dukan kiba don ïa kajuh ka mynsiem ban burom ïa une u nongialam niam uba la long uwei na u rishot baskhem ban kyntiew ym ïa ka bha ka miat bad ka jingim ba kynja mynsiem ha ka Balang Katholik bad uba la long ruh u rishot ba skhem ne u nongïalam ba khraw ha ka jaid bynriew jong ka bri u hynniewtrep hynniewskup ha ka jylla, u la bynrap.
Shuh shuh, u la bynrap ruh ha ka kyrteng jong baroh ki nongshong dukan ki ai ka jingkhublei kaba khatduh ïa u Most Rev. Dominic Jala bad ki buh ruh ka jingduwai ba un ioh ïa kata ka jingjahthaid bym jukut ha ka khet u Blei bad ba u Blei un dang pynmih shuh kum kine ki nongialam ha ka jylla knang ba ki paid riewngeit kin dang heh dan san ha ka jingngeit bad ruh ban don kata ka jingiatrei lang na ka bynta ban kyntiew ym tang ha ka jingim ba kynja mynsiem bad kumjuh ruh na ka bynta ka shongsuk shongsain bad ruh ka bha ka miat bad ka roi ka par ha ka jylla hi baroh kawei, la bynrap shuh shuh u Bah C.B Syiem kum utrai katei ka Iew.