Press "Enter" to skip to content

Kynmaw tympang u Ma Vincent Pala ïa ki sngi leit shaw ïa ka met u Most Rev. Dominic na USA

Shillong, Risaw, 23: Da ka mynsiem kaba sngewsih bad ka mynsiem kaba sngewkhia u MP ka Shillong Parliamentary Constituency u Ma Vincent H. Pala u la pynkymaw sha ki paidriewngeit Catholic mynta ka sngi Balang halor ki jingeh ba u la ïakynduh ha ka jingleit shaw ïa ka met jong u Archbishop ka Jylla Niambah Shillong u Most Rev. Dominic Jala uba la khladnoh ha ka 11 tarik mynta u bnai (10 tarik, Risaw, 2019 katkum ka por ha USA) ha Colusa County, California, USA.
“Hadien kane ka jingjia, dalade hi nga la tyrwa ban leit shaw ïa ka met jong u Archbishop Dominic na California watla ngam tip ïa ka jaka ba la jia bad ïano ngan pan jingïarap, watla na ka liang ki bor pynïaid jong ka Balang ki la pynpaw ba ki don ki Phadar na Oakland kiba lah ban ïarap lem halor kane ka jingjia ba sngewsih,” ong u Ma Vincent Pala haba kren ha ka jingai khublei khatduh mynta ka sngi ontep donburom ïa u Archbishop Dominic Jala ha Iingmane Cathedral ha Laitumkhrah Shillong.
“Hadien ba nga la shim ïa ka rai hapoh ar kynta nga la leit sha USA bad ha kad liengsuiñ San Francisco nga la ïakynduh ïa u Rev. Fr. Paulson bad u Rev. Fr. Jonhson kiba la ïarap ïa nga bad poi sha jaka ba la buh ïa ka met u Archbishop,” u la ong.
“Ha ka 16 tarik ha ka por 7:00 baje mynstep ngi la leit sha Police Station bad tang shi minit ki Pulit ki la pyntip ba ki ladep pynkhreh nadong shadong ïa ka kaiphod halor ka jingjia takhuh kali u Archbishop Dominic Jala, u Rev. Fr. Matthew Vellankal bad u Rev Fr. Joseph Parekatt.
“Ka kali ka la julor bha hadien ba ngi la leit peit namar ka jingshah tynrah ha ka kawei ka trok. Ka jingkhlad jong u Archbishop ka dei na ka jingkyndit shaba palat namarba ka jingkyndit (shock) ka ktah shwa ïa u dohnud bad hadien kata ïa ka jabieng,” ong u Ma Vincent.
“Hapdeng ki jingeh kiba bun la lah ban pynpoi ïa ka met jong u Archbishop Dominic Jala,” u la ong.
“Hadien ba ngi la leit shimti ïa ki tiar ki tar jong u Archbishop Dominic ngi lap ba u rah tang ka Passport, ka Mobile bad ki kot ki sla bad i synduk ba rit ba thep ïa ki jaiñ,” ong u Ma Vincent uba la pynpaw ïa ka jinglynngoh namarba ïalade u la hap ban rah da ka synduk kaba heh ha kine ki sngi ba u leit shaw ïa ka met sha USA.
U la ïathuh ruh shwa ban pynkit ïa ka met ha ka liengsuiñ ki doktor na USA ki la ïathuh ba kan don beit ka jingkylla ha ka durkhmat jong u Archbishop Dominic na ka jinglong bad ka jingkylla ka suiñbneng bad na ka jingpher ka jaka khamtam ruh ba u Archbishop u la khlad hapdeng ka jingmynsaw.
“Hynrei ka long ka kam kaba phylla haduh katta katta, haba ynda la plied ïa ka synduk ha Nazareth Hospital ha ka step jong ka 21 tarik mynta u bnai, ka met jong u Archbishop Dominic kam shym la kylla satia bad wat ki bahaing hasem ruh ki ïohi beit ïa kajuh ka dur kumba la phah lyngba ka mobile phone ha ka por ba ka met ka dang don ha Oakland, USA,” u la ong.
U Ma Vincent u la ong ba ka jingkhladnoh jong u Archbishop Dominic Jala ka la long ka jingduh kaba khraw haduh katta katta ïa ka Balang Catholic ha ka Jylla Niambah Shillong namarba u dei u nongsharai mynsiem uba sngewrit bad uba ieid ïa ki baduk barangli bad uba im sngi ban pynjanai ïa ki jinghikai jong ka Balang ha kaba ïadei bad ki kam mynsiem.