Press "Enter" to skip to content

La tep donburom ïa u Most Rev. Dominic Jala ha Iingmanebah Cathedral, sakhi ki riewngeit Catholic

La pule ïa u kyrwoh sngewlem na u Pope Francis
Shillong, Risaw, 23: Da ki lak ngut ki riewngeit Catholic mynta ka sngi Balang ki la leit on tep donburom ïa ka met jong u Archbishop ka Jylla Niambah Shillong u Most Rev. Dominic Jala ha Iingmanebah Cathedral of Mary Help of Christian, ha Laitumkhrah, Shillong kaba la sdang ha ka por kumba 1:00 baje eiei nohphai sngi.
U Archbishop Dominic Jala u la khladnoh ha ka jingïatakhuh kali ha California, USA ha ka 11 tarik mynta u bnai (10 tarik Risaw, 2019 katkum ka por ha USA). U Rev. Fr Mathew Vellankal, na ka Jylla Kerela uba la trei ha St. Bonaventure, Concord ha California u la khlad lang bad u Archbishop. U Rev. Fr Joseph Parekkatt uba trei ha St. Anne Parish ha Walnut Creek, USA, u la mynsaw jur bad mynta u dang don hapdeng ka jingshah sumar.
Ka met jong u Archbishop Dominic Jala ka la wan poi ha nongbah Shillong ha ka 20 tarik mynta u bnai. Ïa ka met jong u Archbishop la pynrung shwa ha Parish Byrnihat, ha Nongpoh bad ha Umsning bad ha Mawlai ha kaba da ki hajar ngut ki paidriewngeit na Sor bad Khapsor ki la pdiang burom. Hadien kane, la pynkit ïa ka met sha iingkmie na ka bynta shimiet bad ha step 21 tarik mynta u bnai la pynkit pat sha Iingmane Cathedral ha kaba la ailad ïa ki paidbah ba kin wan ai khublei khatduh haduh mynta ka sngi.
Shwa ban tep ïa ka met, la pynlong ïa ka Mass Bakhuid da u Archbishop ka Jylla Niambah Guwahati u Most Rev. John Moolachira ha kaba la synran lang da ki Bishop bad ki Archbishop kiba la wan na kylleng ki Jylla Niam jong ka ri India, kynthup ruh ki Lyngdoh Sohblei bad ki riewniam kiba la pyndap smam ïa ka Iingmane bad kumjuh ki paidriewngiet kiba la pyndap ïa ka phyllaw ingmane bad ïa ka madan Grotto bad sha madan Novice.
Ki don ruh ki Lyngdoh Niam na ka Archdiocese of Oakland, USA kiba la wan sakhi lang ha kane ka sngi tep ïa u Archbishop hapoh ka jingïalam jong u Rev. Fr. Paulson.
Lehse kan dei ruh ka sngi on tep kaba heh tam ha ka Jylla Meghalaya namarba u Archbishop u dei ruh u nongmihkhmat ïa ka Balang Catholic uba la paw bha ha ka thaiñ Shatei Lammihngi ka ri India bad ha ka ri India baroh kawei.
La sakhi ruh ba katba dang pule ïa u kyrwoh sngewlem ba la phah da u Kpa Bakhuid u Pope Francis bad katba u Diocesan Administrator u Rev. Fr. John Madur u dang ai jingkren ki paidbah ki la niad ïa ki ummat na ki khmat.
U Myntri Rangbah ka Jylla u Conrad K. Sangma lem bad ka kynhun Myntri jong u ruh ki la wan ïashim bynta lang ha kane ka sngi, kynthup ruh ki MLA na ka Liang Pyrshah, ki MDC jong ka Khasi Hills Autonomous District Council bad ki Ophisar jong ka Sorkar Jylla bad kiwei kiwei ki nongïalam jong ki jaitniam bapher bapher ka Jylla Meghalaya.
Ka jinglehniam ka la long kaba shongkun shongblei namarba ki bor pynïaid jong ka Cathedral Parish ki la buh ruh da ki LED Screen khnang ba ki paidriewngeit kin ïohi ïa ki jinglehniam kiba la long hapoh ingmane.
U Bishop jong ka Jylla Niam Jowai, u Rt. Rev Victor Lyngdoh haba kren ha ka ktien Khasi ha ka jingpharia ïa ka Ktien u Blei la kyntu ïa ki samla jong ka Balang ba kin nang san nang roi kum u symbai uba bha ba u Most Rev. Dominic Jala u la bet. “Phi ki paid u Blei to nang ïai im da ki nuksa kiba bha namarba ba ka mishon kam dei tang jong ki Lyngdoh Sohblei hynrei ka dei ruh ka jong phi kiba la ïoh ïa ka Baptisma. To long kiba duwai manla ka sngi ha u Trai,” u la bynrap.
Shwa ban rah ïa ka met ha ka thliew jingtep ba la pynkhreh ha ka krung jong ka Iingmane, na ka liang ka Balang ka la pynlong ïa ka jingai khublei khatduh ha kaba la ïashim bynta da u Myntri Rangbah ka Jylla u Conrad Sangma, u Nongïalam ka Liang Pyrshah u Dr. Mukul Sangma, u MP ka Shillong Parliamentary Constiteuncy u Ma Vincent H. Pala.
Shwa kane la pule ruh ïa u kyrwoh sngewlem ba la phah da u Kpa Bakhuid u Pope Francis lyngba u Prefect jong ka Congregation for the Evangelization na ka ri Vatican, u kyrwoh sngewlem na u Secretary of State na ka ri Vatican, u kyrwoh sngewlem na u Major Archbishop jong ka Syro-Malabar Church, Kerela u Cardinal George Alecherry, u kyrwoh sngewlem na u Apostolic Nuncio, New Delhi, u kyrwoh sngewlem na u Archbishop Anil Joseph Thomas Couto uba long u Chairman jong ka CBCI Office for the Clergy and Religious Dialogue, ka jingkren ai khublei na ki Nongmihkhmat jong ka Jylla Niam Jowai bad Nongstoiñ bad na ki nongmihkhmat jong ki kynhun Riewniam bapher bapher.
U Myntri Rangbah ka Jylla u Conrad K. Sangma haba ai khublei khatduh, u la ong, “Ka jylla jong ngi ka la duh noh ïa u briew ym tang ba u dei u Riewniam hynrei u dei u briew uba la noh synniang sha ka Jylla. Ha ki ar snem duna ba u Archbishop Dominic Jala u la long u Nongsharai Mynsiem u la long ka nuska jong ka jingsngewrit bad ka jingieid kaba kyrpang ïa kiba duk.
U la pynkynmaw ruh ba u Archbishop u dei uba don ka jingïadei kaba jan bha bad ka iing ka sem jong u Purno Sangma bad pynpaw ruh ba um ïapher satia na ka jingim jong u Don Bosco Bakhuid ïa uba la ieid bad burom da ki jait niam namar u synniang u bynhei ba u la noh sha u sup u thiar jong ka imlang ka sahlang.
U Dr. Louise Jala u hymmen trai jong u Most Rev. Dominic Jala haba kren ha kane ka sngi, u la ong, “ka jingkhladnoh jong u Arcbishop Dominic Jala ka long ka jingduh kaba khraw ïa ka iing ka sem, ïa ka Balang bad ïa ka jaidbynriew hi baroh kawei.
“Ka thong kaba phi anngud ban ïohi ïa ka jingïatylli jong ki Balang ka la wan urlong ha kane ka sngi. Ka jingkhlad jong phi ka la pynsakhi ïa ka jingïatylli jong ki kynhun Balang bapher bapher. Leit suk Bahdeng (Arcbishop Dominic Jala). Ngi la sakhi da la ki jong ki khmat ïa kiei kiei kiba la phi la leh. Ngim don jingsahnud shuh na ka liang ka iing ka sem,” ai khublei khatduh une u Hymmen trai ïa la u para, u Most Rev. Dominic Jala.
Shwa ban rah ïa ka met sha thiew jingtep, na ka liang u Diocesan Administrator u Rev. Fr. John Madur u la aiti ïa ka Diengphna sha ki bahaing hasem jong u Archbishop ba kin buh sah jingkynmaw.
Ïa ka jingtep la lah ban tep khyndew haduh ha ka por mynmiet hadien ba la ailad ïa ki paidbah ban bret khyndew bad ai khublei khatduh ha ka thliew jingtep ba la tih ha ka krung jong ka iingmane ha kaba la pynthiah ïa ka met jong u Archbishop Dominic Jala. Ïa u Most Rev. Dominic Jala uba la dap 68 snem ka rta, la kha ha ka 12 tarik, Naitung, 1951 ha Mawlai. U la shah pynkyntang kum u Lyngdoh jong ka Jingïasyllok Salesian of Don Bosco (SDB) ha ka 19 tarik, Naiwieng, 1977.
Ha ka 22 tarik Nohprah, 1999 u la shah jied ha u Pope John Paul-II ban long u nongsharai mynsiem jong ka Jylla Niambah Shillong bad la pynkyntang Bishop ïa u ha ka 2 tarik, Ïaiong, 2000.
Kum ban shu pynkynmaw hangne, u Archbishop Dominic Jala u dei u Bishop Khasi uba ar uba u la shah pynkhamti ïa kane ka kyrdan Nongsharai Mynsiem hadien ka jingkhladnoh jong u Arcbishop Tarcisius Resto Phanrang uba long Bishop banykong eh napdeng ka jaidbynriew Khasi.
U Nongthoh khubor haba ïakren bad ki katto katne ngut ki paidriewngeit ka Balang Catholic ki la pynpaw ba ka jingkhladnoh jong u Most Rev. Dominic Jala ka long shisha ka jingduh kaba khraw ïa ka Balang Catholic ha kane ka Bri u Hynñiewtrep.