Press "Enter" to skip to content

Leit jngoh ka FKJGP ïa ki Nongtrei ka GVK-EMRI, shen yn pynbna jingïakhih

Shillong, Risaw 23: Ki Nongïalam ka seng Federation of Khasi Jaiñtia & Garo People (FKJGP) hynne ka sngi balang, kila leit jngoh bad ïakynduh ïa ki Nongtrei ka GVK-EMRI kiba ïakhih bad kular ba ka Seng kan nym shongkli kti ban khmih lem ïa ka bha ka miat jong ki.
Ki Nongïalam ka FKJGP hapoh ka jingïalam u President Bah Wellbirth Rani bad Vice President Bah Eldie N Lyngdoh kila ïakren ruh bad ki para Sengbhalang ba ju iatreilang, ba kin iatreilang ha kaban pynthikna ba ka Sorkar Jylla ka dei ban pynbeit noh mardor ïa ka jingeh jong ki Nongtrei ka GVK-EMRI kiba la ai ka jingshakri ba kongsan tam sha ki paidbah nongshongshnong ka Jylla.
Ka FKJGP dang khyndiat sngi kala byrngem ba kan sa tuklar hi noh ïa ka jingeh jong ki Nongtrei ka GVK-EMRI haba aipor arsngi-lai sngi ïa ka Sorkar ba kan pynbeit noh ïa ka kynrum kynram ba mih hapdeng ka komapni GVK-EMRI bad ki Nongtrei.
“Ngi ïohi ba ka Sorkar Jylla kam patiaw satia haduh mynta…shen ngin sa ïakynduh noh ïa ki paralok sengbhalang bad ngin sa shim ïa ka rai ban ïakhih. Ngin sa pynbna ïa ki jingïakhih jong ngi ha kine ki khyndiat sngi” ong ki Nongïalam ka FKJGP.
Lah ban kdew hangne ba ka Sorkar Jylla kala rai ban ai ïa ka notice ban pynsangeh noh ïa ka jingshakri jogn ka GVK_EMRI lada kam lah ban pynsdang biang ïa ka jingshakri jong ki kali 108 Ambulance hapoh ka arbnai ha baroh kawei ka Jylla.
“Ngin pynduh noh ïa ka contract bad ka GVK-EMRI lada kam lah ban pynsdang biang ïa ka jingshakri ki kali 108” ong u Myntri ka koit ka khiah Bah A.L.Hek haba ïakren bad ki lad pathai khubor hadien ka jingïalang bad ki Heh ka GVK-EMRI hynnin ka sngi.
Ha kajuh ka por, ka FKJGP kala dawa ruh ïa ka Sorkar Jylla bad ka Tnad ka koit ka khiah ba kan thung ïa ka jingtohkit halor ka jingkynnoh ba pyndonkam bakla ka GVK-EMRI ïa ka song tyngka bala ai da ka Sorkar Jylla ban maramot ïa ki kali 108 Ambulance, kaba long T 1.47 lak kawei ka kali ha ka shibnai.