Press "Enter" to skip to content

Noh syniang ka MPUF sha ki longïing ki baduk ha ka shnong Iongkaluh

Khliehriat Risaw 22:Ki ar tylli ki long ïing na shnong Iongkaluh,ki la ioh pdiang ïa ki jingai jingiarap kum ka jingnohsyniang ba la ai da ki nongïalam bad ki dkhot jong ka seng Meghlaya People United Front East Jaintia Hills District mynta ka sngi ka 22 tarik u Risaw,kaba la lam khmat da u bah Kyrshan Blah,President MPUF-Khliehriat Circle.
Ki dkhot jong ka seng ki la noh syniang da ki mar bam ba kynthup u khaw,ka shini,ki jaiñ kup,jaiñ sem,ki blanket bad kiwei kiwei sha ki ar tylli ki longïing ba duk kiba kynthup ka long ïing jong i kong Misila Dkhar,kaba dei ka long kmie kaba don lai ngut ki khun ha ka ba u kpa jong ka ïing u la khlad noh bad kumjuh ruh la noh syniang sha kawei ka longïing jong ki khunswet kiba don hynniew ngut shi para kiba la duh noh ïa ka kmie bad ki im tang bad u kpa uba shu trei bylla.
Ha shwa ban aiti ïa ki tiar sha kitei ki ar tylli ki longïing ka la don ka jingïalang kaba lyngkot kaba la pynïaid da u Wompher Dkhar,dkhot jong ka MPUF,la ïoh ka jingkren na u bah Kyrshan Blah,ha kaba u la ong ba “ïa kum kine ki briew ba sah khunswet khunrangli haba peit ka ktah haduh katta katta ïa nga kum nongïalam bad ka seng hi baroh kawei, namar ïa kum kine ki briew ki nongïalam shnong ne ki nongmihkhmat naduh ki MDC ki MLA ki dei ban peit bad wad lad jingïarap ïa ki, namar kum ba ïohi mynta kine ki longïing wat tang ka ïing ba ki shong ki sah ruh kam long shuh kaba shngaiñ ïa ki namar ki la jot la pra palat bad kum ki nongïalam shnong ki donkam tang ka jingïakren ban pynithiuh sha ka sorkar ba kine ki longïing ki long kiba duk kiba dei hok ban ïoh ka Scheme na ka sorkar, namar mynta ka sorkar ka don shibun ki scheme ai jingïarap ïa kiba duk ba rangli bad ki sah khunswet, namar ka sorkar jong ka ri India hi mynta ka ïa leh tyngeh kumno ban rat dyngkhong ïa ka jingduk jingrangli kumjuh ka don ka thong ban pynïoh ïing lut ïa ki briew baroh bad ka la don ruh ki scheme ba kyrpang ban shna ïing ïa kiba duk, hynrei donkam ka jingpynithuh da ki nongïalam shnong sha ka sorkar khnang ba ka sorkar kan tip ban ai jingïarap”.
“Kaba iphylla pat ban peit shano jah ki nongïalam shnong ne ki nongmih khmat haba haduh mynta kum kine ki longïing ki dang don hapoh ka shnong ka thaw kaba mynta la jan baroh ki nongkyndong ruh ki la ïashai lut”ong shuh shuh u bah Kyrshan Blah ha kaba u la kyntu ïa ki nongïalam shnong naduh ki Rangbah Shnong ki Secretary shnong ba ki dei ban peit ïa kum kine ki briew kiba donkam shisha ka jingïarap na ka sorkar, ym tang ban long nongïalam shnong ban ïoh nong, hynrei ka kamram jong ki ka dei ruh ban peit bad ïarap ïa kiba duk ba rangli namar kim donkam ban pyllut hynrei tang ban pyntip sha ka sorkar.
U bah Kyrshan Blah u la ong ba kane ka jingleit ai jingïarap jong ka seng ka long ba kum u nongïalam seng um lah shuh ban shu peit ïa ka jingshem jingeh jong kine ki longïing, kumta ym banse ban shu ïa synniang bad wad jingïarap katba lah ka bor ban leit ai ïarap sha kine ki ar tylli ki long ïing ha shnong Iongkaluh.
La ioh ruh ka jingkren na u samla David Dkhar,President (MPUF) Ladrymbai Unit,na u samla Johny Phawa,President(MPUF) Mukhaialong san Shnong Circle ha kaba la ïa don ryngkat lang ki dkhot jong ka seng bad ki dkhot jong kitei ki ar tylli ki longïing.