Press "Enter" to skip to content

Palat T.800 klur pynsah ram ka Sorkar ha ki Contractor ka Jylla

Shillong, Risaw 23: Ka Sorkar Jylla kala pynsahram ïa palat T. 800 klur ba kan hap siew kum ki Bill sha ki Contractor kiba pyntrei ïa ki project kam pynroi bapher bapher ha kylleng ka Jylla, kaba la kiew suki pa suki naduh u snem 2015 haduh mynta mynne.
Haba ïakren bad ki nongthoh khubor, u Symbud Myntri Rangbah ka Jylla Bah Prestone Tynsong ula ong bane ka ram ka dei ka ba pynsah hapoh ka Tnad PWD bad kane ka dei kaba nang kynton naduh usnem 2015 haduh mynta u snem.
U Symbud Myntri ula pyntip ba ka Sorkar Jylla kala kut jingmut ban sa pyllait noh ïa katto katne ka pisa ban pynkhuid noh ïa ki Bill jong ki Contractor hapoh u bnai Nohprah mynta u snem.
“Ngi dang thaw ïa ki lad ki lynti ban pynkhuid noh ïa baroh ka pisa ba sah manla ka lai bnai khnang ban pynduna noh ïa ka jinghap pyllait pisa ki Bank shisien pyllait bad ruh ban siew ïa ki Contractor ha ka dur jong ki running bill lynga ki PWD Division bapher bapher” ong u Myntri.
Dang shen, u Nongïalam ka Liang Pyrshah u Dr Mukul Sangma ula kynnoh ba baroh ki kam pynroi hapoh ka Jylla kila sangeh lut mynta namar ba bun ki Contractor kim kwah shuh ban trei kam ba kim ju ïoh ïaki Bill.
Haba kylli, u Symbud Myntri Rangbah ula ther kylla ïa ka Congress kaba ïalam ïa ka Sorkar bala leit noh namar ka jingphah trei ïa ki kam pynroi ba kot palat T. 300 klur khlem da don pisa.
Kat kum ka jingong u Bah Prestone, ïa kine ki project la mang pisa shuwa jong ka elekshon MLA 2018 ha ka por ba ka Congress ka don ha ka bor.
“Kum ki nongïalam ba don jingkitkhlieh, ngi dei tang ban shu mang ïa ki project kat shaba phai tang ban shu pynbiej ïa ki paidbah hashuwa ka elekshon” ong u Bah Prestone haba kynthup ba kine ki jingleh ka Congress hi kiba la buh mynta ha ka jingeh ïa ka Sorkar MDA.
Dang shen, u Myntri Rangbah ka Jylla Conrad Kongkal Sangma ula pynpaw ba kam pat ju poi satia ka khep ba ka jingpyntreikam ïa ki kam pynroi hapoh ka Jylla kan hap ban sangeh.
U Conrad ula ong ba dei ha ka por jong ka Sorkar Congress ba ka khlem phah satia ïa ki UC sha ka Sorkar Pdeng bad ka Sorkar ba mynta ka dang pyr shang ban pynbeit ïa kine ki jingleh bakla jong ka.
“Lada phi khmih ïa ki kot ki sla kiba ri….ha ka por jong ki bad ka sorkar jong ki, ki khlem phah satia ïa ki UC haduh mynta mynne. Tang hapoh ka Ministry of Tribal Affairs, naduh u 2015-2016, 2016-2017, ym shym la ïoh shuh ïa ki kam pynroi/ki programme namar ka jingleh ka Sorkar barim. Mynta ngi dang pyrshang ban pynbeit ïa kine kiei kiei kiba khlem pyndep da ka Sorkar bala leit noh” ula ong.