Press "Enter" to skip to content

Lum u CM ïa ka ‘All Party Meeting’ ban tip ïa ki nongrim halor ka CAB

Shillong, Risaw 30: U Myntri Rangbah ka Jylla Conrad Kongkal Sangma hynne ka sngi balang, ula lum ïa ka jingïalang jong baroh ki seng saiñ hima ka Jylla (All Party meeting) ban shim ïa ka jingpynsngew bad jingai jingmut jong ki halor ka Citizenship 9Amendment) Bill 2016, kaba thmu ban pynlong nongshongshnong ïa ki phetwir na Bangladesh, Pakistan bad Afghanistan.
Hadien ka jingïalang, u Conrad ula pyntip sha ki lad pathai khubor ba ka jingthmu jong kane ka jingïalang ki seng saiñ hima ka long eh ban tip ïa kiei ki mat kiba don ha ka CAB kiba ki seng saiñ hima ki sngew pyrshah.
Haba ban jur ïa ka nongrim jongka Sorkar Meghalaya Democratic Alliance pyrshah ïa ka CAB, u Myntri Rangbah ula ong ba ka jingïalang jong baroh ki seng saiñ pyrthei ka dei ruh kaba la pynlong halor ka jingkyrpad jong u Myntri kam pohïing ka ri u Amit Shah, uba dang ïaid ïasyllok mynta ban sngewthuh ïa kiei ki jingsngewkhia jong ki seng saiñ pyrthei.
“Ka Delhi ka tip bha ba baroh ki seng saiñ pyrthei ka thaiñ Shatei Lam Mihngi ki pyrshah jur ïa ka CAB bad mynta ka Sorkar India ka ong, to ngin ïakren shuwa ban sngewthuh ïa kaei kata kaba pynkhuslai ïa baroh” ula ong.
Haba iaroh ïa ka rai jong ka Sorkar Pdeng ban shim ïa kane ka lynti ban pynlong shuwa ïa ka jingïasyllok, u Conrad ula ong “Namar kata, ngi la khot ïa kane ka jingïalang hynne ka sngi khnang ba ngin iamir jingmut lang namar kum kane ka jingïasyllok kam shym la don satia ha kato ka por ba mynjur ïa ka CAB hapoh ka Lok Sabha”.
U Myntri Rangbah ula bynrap “Ngi kyrmen skhem ba ka Ministry of Home Affairs kan sa wan ban pan ïa ki jingai jingmut jong ngi bad kumjuh ruh na kiwei kiwei ki kynhun”.
U Conrad u pyntip ba ha kane ka jingïalang, la wan ban ïashimbynta da ki nongmihkhmat na ki 7 tylli ki seng saiñ pyrthei ba kynthup ïa ka Congress kaba don ha ka liang pyrshah bad baroh kila pynsngew ïala ki jong ki jingsngew bad ki jingai jingmut halor ka CAB. “Ngi la kyntu ruh ïa ki ba kin phah ïa ki jingpynsngew jong ki da ka jingthoh sha ka Sorkar Jylla” ula ong.
Haba kylli, u Myntri Rangbah ula ong ba ki seng saiñ pyrthei kila pynpaw ïa ka jingsngewkhia halor ki mat bapher bapher khamtam eh ïa ka mat la ka CAB kam pdiang ïa kino kino ki briew ha kano kano ka por bad hato kan ïaid lait ïa ka Sorkar Jylla ha ka jingpynshisha ïa ki briew.
U Conrad u ong ba ki seng saiñ pyrthei ki kwah ruh ban tip la ki aiñ kiba la don lypa kynthup ki kyndon jong ka Sixth Schedule, ka Meghalaya Residents, Safety and Security Act, 2016 kin nang treikam ne em shisien bala treikam ka CAB. “Kila buh jingkylli ruh halor kiwei kiwei ki aiñ ki ban pynthikna ïa ki lad jingiada ïa ki paid riewlum ka thaiñ shatei lam mihngi bad ka Meghalaya”.
Haba sdang jong une u bnai, ki kynhun bapher bapher jong ka thaiñ Shatei Lam Mihngi kila pynlong ïa ki jingïakhih kynthup ha Meghalaya, ba dawa ïa ka Sorkar Pdeng ban pynkut noh ïa ka CAB. Kumjuh ruh ka North East Indigenous People’s Forum (NEIPF) dang shen kala rai ban sa phah jingthoh sha ki Myntri Rangbah jong ki Jylla ka thaiñ ba kin iatylli kawei ha kaban pyrshah ïa ka CAB.
Ha kajuh ka por, ka jingïalang ki seng saiñ pyrthei kila ïasyllok ruh halor ka jingtyrwa ban pynkylla thymmai ïa ka Sixth Schedule jong ka Riti Synshar ka Ri, Kat kum ka jingong u Myntri Rangbah, ka mat kaba pynsngewkhia bha ïa ki seng saiñ pyrthei ka dei ka kyndon ban thung MDC ba shusieh ïa ki paid riewlum kibym dei ki trai shnong ka Jylla ha ki District Council.
U Conrad u pyntip ba ka Sorkar Jylla kala dep phah ktien ïa ka nongrim jong ka sha ka Sorkar Pdeng haba pyntip ba u Myntri ka Tnad DCA u James K Sangma ula don mynta ha New Delhi bad un sa leit ïakren ïa kane ka mat bad ka Sorkar Pdeng.
Lah ban kdew hangne ba ka Committee bala thaw da ka Sorkar Jylla kala ai jingmut ba donkam ban pyndam noh ïa ka kyntien ‘UNrepresented Tribe” na ka jingtywa pynkylla thymmai ïa ka Sixth Schedule.