Press "Enter" to skip to content

Mynsaw 20 ngut ki shipai BSF, ïap uwei ha ka jinghap ka Bos ha riat Umtyra, East Jaiñtia Hills District

Khliehriat, Risaw, 25: Ka trok kaba kit haduh ar phew ngut ki shipai Border Security Force (BSF) ka la thung baji ha kawei ka riat ha Umtyra, East Jaiñtia Hills District.
Kine ki arphew ngut ki shipai BSF lem bad arngut kiba ñiah ïa ka Bos ki la mynsaw jur bad uwei uba dei u nongïarap (Helper) uba kyrteng u Jogto Gogoi u la khladnoh ha Khliehriat CHC na ka daw bajur palat ka jingmynsaw.
Kane ka jinghap jong kane ka Bos ka la jia mynta ka sngi Balang ha ka por kumba 3.30 nohphai sngi.
Kane ka Bos jong ki shipai BSF jong ka 93 Battalion kaba don u number AS-05-C-2034 kaba kit ïa ki shipai kiba dang wan pyndep ïa ka NRC Duty na Golahgat,Assam bad thmu ban leit phai sha ka Jylla Manipur hynrei ynda poi ha kawei ka jaka ba kham long riat ha ka shnong Umtyra ka la kylla khongpong shariat. Ia kiba mynsaw la pynkit noh marmar sha Khliehriat CHC bad hadien pat la pynkit noh ruh ïa kiba mynsaw jur sha NEIGRIMS Hospital, Shillong.
Kiba mynsaw ki kynthup ia u I.Kulandi Swami (S.I), u Dinesh Kumar (H.C), u Anil Kumar Sharma (H.C), u Yash Pal (H.C), u Pawan Kumar (H.C), u J.Kerkeha (H.C), u A.Baxala (H.C), u Balwinder Singh (C.T), u Purushottan Lal(C.T), u S,K,Pandey (C.T), u Yamanappa (C.T), u B.J.Kalita (C.T), u Raventa Ram (C.T), u M.S. Molla (C,T), u Raju Sah (C.T), u M.Dipesh Pangul (C.T),u Mohan Lal Meena (C.T), u Ramod Kumar (C.T), u J.N.Tiwari (C.T), u Kuldeep Singh (C.T/Cook), ki ar ngut kiba ñiah ïa ka kali pat ki bym dei ki shipai ki kynthup u Pranjal Saikia bad u Baba Gogoi.
Shimpor ar kynta tam ban poi ki Ambulance ha Umtyra: Ka shimpor haduh ar kynta tam ban poi ki kali Ambulance na ka bynta ban pynkit ia ki shipai BSF jong ka 93 Battalion kiba la mynsaw jur ha ka jinghap ka trok ha ka riat ha ka shnong Umtyra.
Ia kine kiba la mynsaw la pynkit sha Khliehriat CHC. La lap ruh ba ka jingwan poi ki kali Ambulance ha Hospital Khliehriat ka slem palat ha kaba ki Ambulance ki la poi haduh ka por 6:00 baje tam mynta janmiet katba kane ka Bos kaba kit ia ki shipai BSF ka la hap ha kane ka lhuh bajylliew ha ka por kumba 3:30 baje nohphai sngi.
Kane ka jingwan poi slem ki kali Ambulance ban kit ïa ki shipai kiba mynsaw jur sha ki Hospital kiba biang ka la pynlynga haduh katta katta ïa ki shipai BSF kiba la wan ban ïarap ïa kiba mynsaw
Ki Ambulance kiba la poi ban ai jingiarap ki kynthup ia ki Ambulance jong ka National Authority of India, ki Ambulance jong ki Karkhana dewbilat (Dalmia,Star Cement,Top Cem Cement bad kiwei kiwei) bad kumjuh ruh ki Ambulance na Khliehriat, Lad Sutnga bad na kiwei kiwei ki shnong.
Ai khublei ki SP ïa paidbah ba iarap ïa ki shipai BSF ba mynsaw: Ki ar ngut ki Superintendent of Police (SP) ba kynthup ia u SP ka West Jaiñtia Hills u Bah Lakador Syiem,bad u Vivekanand Singh, u Superintendent of Police East Jaiñtia Hills District ki la phah u kyrwoh ai khublei sha baroh kiba la donkti ban ïarap ïa ki shipai Border Security Force (BSF) kiba la mynsaw ha ka jinghap ka trok sha riat ha Umtyra.
Kine ki arngut ki la Superintendent of Police ki la ai khublei ia ki Doctor, ki Nurse, ki Staff jong ka CHC Khliehriat, sha ki paidbah kiba la ïarap ban pynpoi ïa ki shipai kiba mynsaw sha Hospital bad ha kajuh ka por ki la ai khublei ïa baroh kito kiba la ai ïa ki kali kit nongpang (Ambulance), kum ki company dewbilat, ka NHAI, ki Dorbar shnong, ha kaba la ioh ban pynkit ïa ki shipai sha ki jaka sumar sha NEIGRIMS Hospital Shillong.