Press "Enter" to skip to content

Dawa ka JARF ïa ka Sorkar bad ka District Council ban shim khia ïa ka kam tih dewïong kaba la ktah ïa u paidbah

Shen yn leit pynsngew sha ka Sorkar Jylla bad sha ka District Council

Khliehriat, Naiwieng, 9: Ha ka jingialang Dorbarbah ba la khot pynlong da ka Jaiñtia Amalgamated Redressal Forum mynta ka sngi saitjaiñ ha Tuber Sohshrieh ki nongialam jong kane ka kynhun bad ki Muktiar ki la kynthoh jur bad ong ba dei na ka daw ba ka Sorkar Jylla bad ka District Council ki bym ju shimkhia ïa kane ka kam ha kaba kim patiaw satia ïa ka iap ka im jong u piadbah uba la shah ktah jur naduh ba shah khang ban tih bad shalan dewiong bad ki la pynpaw ka jingsngew khia kaba jur halor ka jingshah pynngat ha ki kyndon aiñ jong ka MMDR Act ha kaba ka MMDR ka la buh ïa ki paidbah ha ka umdum mynta.
U Bah Kerlang Ksoo, Advocate u la ai ka jingpynshai sha ki paidbah halor ki kyndon aiñ jong ka MMDR. U la ïathuh ba ka jingtrei dewiong lyngba kane ka MMDR ka long kaba eh haduh katta katta.
“Ka sorkar ka tip bha ïa ki aiñ tangba kam pynpaw. Ka don ruh ka High Wall Mining kaba donkam ka jinglut kaba heh kaba ym duna ïa ka T130 klur. Ka High Wall Mining ka donkam ruh ka jaka kaba heh, ki kot ki sla kiba biang. Ha kata ka por shano ngin poi ha kaba na ka liang ka Sorkar ruh kam ju ïalam lynti ïa ngi ha ka rukom kaba biang. Ka jingbym don ryngkat ka Sorkar bad ngi ki paidbah ka buh jingeh ïa ngi haduh katta katta. Ka Sorkar kam lah ban pynshai kumno ngin leh hynrei ka shu pynleit jingmut tang ha ka transportation kaba ngi sngewthuh ba kane kan ym poi shano shano lada ngi shaniah ha ka Sorkar,” ong u ma Kerlang Ksoo
U ma Lakhon Biam, MDC u la ai jingmut ïa ki dkhot ka Forum ba kin ai da ka jingthoh sha ka District Council. “Namar lada ka District Council ka iaid ryngkat kan don beit ka jingseisoh,” u la ong bad bynrap, “katba ngi dang sah umdum ha ka kane ka jingshah khang tih dewiong hynrei ngim tip pat ba ki bor kiba na shabar mynta ki dang pyrshang pynban ban pynkylla ïa ka Sixth Shedule ha kaba ki la sdang ban mushlia ruh wat ïa ka District Council ban pynduh bor ïa ka.” U la kyntu ïa ki paidbah ba ki dei ban ieng tylli kawei ka buit kawei ka bor.
U Bah Ohibait Dkhar, President ka Khasi Students Union, Jaiñtia Hills Unit u la kynthoh jur ïa ki nongialam kiba dei ki nongthaw aiñ, ki nongsaiñ hima bad ong “shano ki MDC ki MLA kiba dei ki nongmihkhmat kaei kaba ki la leh, kat kane ka iap ka im jong ngi hato ki hun ba u paidbah un iap? Ha ka jingshisha ka District Council ka dei kaba nyngkong ka ban mih shakhmat ban iasaid na ka bynta u paidbah kam pher watla ki aiñ ki khanglad hynrei ieng na ka bynta u paidbah namar haba ieng ha ka nongrim ki don beit ki lad ki lynti.”
U Na Hambertus Nongtdu, uba dei ruh u CEM barim jong ka JHADC u la kyntu jur ïa ki paidbah ba kin ai ka jingkyrshan ïa kane ka Forum bad ong “ngi la jan hap sha riat la jan kut mynta to ngin kyndit bynriew noh ba ngim dei ban buh ka jingsngew party namar kane ka dei ka kam iap kam im jong ka jaitbynriew.”
Ka Kong Violet Lyngdoh,MDC barim haba kren ha kane ka jingialang ka la ong, “to ngin khmihlynti ba kane ka Forum kan wad ki lad ki lynti ban iarap ïa ngi ki paidbah baroh kiba la shah ktah jur na ka daw ba khang tih dewiong bad to tip ba ka shi kali u dewiong lah ban bsa haduh sawphew tylli ki longiing.”
Haba kynthoh ïa ka Sorkar ka a ong, “ ka Sorkar haduh mynta hi kam shym la shim khia ïa kane ka jingeh. Bun ki khynnah kiba la pep skul noh shiteng por, bun ki dukan la khang khyrdep, shibun ki briew kiba shu shong khlem kam khlem jam kumta haba nga iohi ïa kine kiei kiei kum ka longkmie nga ai ka jingkyrshan ïa kane ka Forum bad ai ruh ka jingkitbok kitrwiang ban poi sha ka thong.”
U Bah A.Lipon, President ka Synjuk ki Wahehshnong Ri Jaiñtia,u la pynpaw ka jingsngewkhia halor ka jingshah ktah ki paidbah naduh ba khang ban tih ban shalan ia u dewiong.
Kiba la ai jingkren ki kynthup ruh u bah Leninstar Rymbai, President jong ka Jaiñtia Students Movement Central Body, u Bah Nidamon Shullet, President ka Jaiñtia Truck Owner Association, u Bah Reachingson Siangshai bad kiwei kiwei.
Ki rai kiba la shim ha kane ka sngi ki long ba ki dkhot jong ka Jaiñtia Amalgamated Redressal Forum kin sa leit ban ïa kynduh ïa ki dkhot ka District Council bad kin leit ruh sha ka Sorkar bad kaei kaba mih na kane ka jingleitkynduh jong ki yn sa pynsngew biang ha kawei pat ka dorbar. Ka Forum kan sa khot pynlong biang ïa ka Dorbar bah.
Wat hapdeng ka jingbym ailad ka mariang ruh, ki paidbah kiba kynthup ki nongtrei dewiong, ki nongbylla sngi, ki nong ñiah kali bad ki paidbah ki la wan poi ryntih sha ka jingialang.
Ki nongialam kiba ha khmat eh jong ka JMRF ki kynthup ia u Chairman u Bah Halping Phawa, ki Vice Chairman ki long u Bah Donnu Nongpluh, u Bah Satly Ryngkhlem, General Secretary, u Bah Lenningstar Rymbai, Assistant Secretary, u Bah Reachingson Siangshai, Spokeperson bah Justine Dkhar, Treasurer Bah Thomas Nongtdu, Legal Adviser Bah Kerlang Ksoo (Advocate), Organising Secretary Bah bah Sambormi Lyngdoh. ïa kine ki dkhot nongkitkam jong ka Forum la pynskhem hi hynne ka sngi da u Bah E.W.D Ryngkhlem.