Press "Enter" to skip to content

Ha ryngkat ka jingshongkun, kut noh ka tamasa 100 ksing ka Wangala

Tura, Naiwieng 09 : Ka tamasa jong ki 100 ksing lane ka lehniam Wangala ka la kut noh hynne ka sngi Saitjaiñ hapdeng ka jingshongkun ha kaba da ki spah spah ngut ki paidbah na ka rilum Garo ki la wan ban snohkti lang ban rakhe ïa katei ka sngi khraw.
Ha kane ka sngi la don langruh u Myntri Rangbah ka Jylla, Conrad K Sangma uba la ai ka jingïaroh ïa ka Wangala Committee kaba la lah ban pynphuh ïa katei ka jinglehniam mynta ka kynti ban pynneh pynsah ïa ka kolshor jong ki Garo.
Da kaba banjr ba donkam ban pynkhlaiñ shuh shuh kumno ban ïada ban pynneh pynsah ïa ka riti dustur bad ka kolshor jong ka Jaidbynriew, u Conrad u la ong ruh ba kadei ka jingphohsniew jong u (L) PA Sangma ba dei ruh u kpa ong u, ban don noh da ka Tribal Research Centre ha ka jylla ha kaba ka sorkar ka la buh dang shen da ka Tribal Research Institute ha katei ka distrik.
Da kaba ïathuh ba u la wan sha katei ka jinglehniam beit beit na Bangladesh, u Myntri Rangbah u la ong ruh ba ki jaidbynriew Garo kiba don ha katei ka Ri ki la pynpaw ïa ka jingkwah ban wan sha kane ka thaiñ ban kynduh halor ka rukom long rukom man bad khamtam eh ha kaba ïadei bad ka kolshor.
La ïoh ruh ïa ka jingkren na u Chairman ka Wangala Committee, u LR Ch Momin u ba la batai bniah halor ka jingpynlong ïa katei ka tamasa 100 ksing kaba ju pynlong man u snem hadien ka aiom ot.
Ki nongjngoh kai pyrthei na kylleng ki bynta jong ka pyrthei kynthup naduh Netherlands, Brazil, Greece, France, USA, UK kynthup na ka jylla Maharastra, New Delhi, Bihar bad Assam ki la wan lang ban sakhi ïa katei ka jinglehniam naduh shisngi shuwa ka Wangala.
Ki 10 kynhun kiba shim bynta ha katei ka jingshad ki kynthup naduh Sadolbra, Selbalgre, Sasatgre, Rohonpara, Tekmanpara na South West Garo Hills, Halua na Resubelpara, Gondenggre, Dalbengre, Rakdikgre bad Chokpot. Bad ka kynhun kaba ïoh ban rah ïa ka nam lahduh mynta u snem kadei ka Sadolbra bud sa ka Gondenggre bad Dalbengre. Shwa kane, u Myntri Rangbah u la aiti ruh ïa ka cheque ba 25 lak tyngka sha ki bor pynïaid kum ka jingkyrshan na ka liang ka sorkar jylla.