Press "Enter" to skip to content

Ïaid paidbah ka Congress ha Shillong ban pyrshah ïa ka rukom treikam ka BJP

Shillong, Naiwieng 09: Kum shi bynta ban ïa snohkti ha ka jingïakhih ha baroh kawei ka Ri Indïa ban pyrshah ïa ka rukom jingsynshar ka Bharatiya Janata Party (BJP) bad ïa ka jingthmu ka sorkar NDA ba lam khmat da ka BJP ban pyntrei kam ïa ka Citizenship Amendment Bill (CAB), 2016, ka Meghalaya Pradesh Congress Committee (MPCC) ha ka sngi saitjain ka la pynlong ïa ka jingïakhih da kaba ïaid paidbah ha nongbah Shillong na Congress Bhavan sha Khyndailad.““Ka All India Congress Committee (AICC) ka la bthah ïa baroh ki jylla ha ka Ri Indïa ban ïa khih pyrshah bad kane ka la sdang naduh ka 5 tarik haduh ka ka 15 tarik mynta u bnai. Kane ka jingïakhih ka long ban pyrshah ïa ka jingsynshar bakla jong ka BJP, ka jingkyrduh kam jong ki samla kaba kiew palat mynta ban ïa ki 45 snem kiba la leitnoh, ka jinghiar ha ka rep ka riang, ka khaii   pateng, ka ioh ka kot bad ka jing-wanrah ïa ka jing-sngew ïapher ha ka kyrteng jong ka niam ne jing-ngeit”, la ong u Working President ka MPCC, u Dr Celestine Lyngdoh.
Halor ka”Make in India” ïa kaba ka sorkar pdeng ka la pynlut shibun ka pisa shibun, u Dr Celestine u la ong, “Hynrei ym don ba wan ban seng kam ha kane ka Ri Indïa bad wat uta u ba kren ïa kane ka phang ruh u la sngap jar. U Myntri Rangbahduh u shang sha baroh ki ri jong ka pyrthei, hynrei ym don u wei ruh ban wan ban pynmih kam haka Ri Indïa ban ïa snoh kti lang na bynta ka projek Make in India. Ka lah phiel kato ka projek”.
Halor ka CAB, u Dr Celestine Lyngdoh, u la ong, “Ngin pyrshah ïa ka CAB bad ka sorkar BJP ka leh thombor ha Ing Dorbar Lok Sabha ba ki ïa bun ngut bad mynta u bnai wat ha ka Ing Dorbar Rajya Sabha kin sa pyrshang biang lada ki ïa bun. Hynrei kum ka party lada ngi jop ne rem, ngi bun paid ne duna paid, ngin ieng beit ha ka nongrim ban pyrshah ïa ka CAB namar kan sa ktah ïaka jaidbynriew khamtam ïa ki rit paid ha ri India”.
U la ong ba mynta la ïaid ki jing ïakren ba bun ha ki tnad sorkar ba kan sa poi ka por ba ki nongtrei kin sa duh tulop. “Ka jing pynïaid ïa ka pisa tyngka ha kane ka jylla ka jong ngi kam don ka lawei. Ka shong suk shong sain ki la ioh pateng na ka sorkar congress bad ngam tip haduh katno kan bteng”, u la ongda kaba pynpaw ba ka jing-khmih lynti kane ka sorkar kan dang bteng ïa kaei kaba bha ba ka Congress ka la leh.
Haba kylli halor ka jingïakhih pyrshah ki nongtrei EMRI, u Dr Celestine Lyngdoh u la ong, “Nga ong ïa phi ba kim lah ban iohi jngai, kim lah ban wanrah ka lad ban weng jingeh jong ki paidbah. U myntri ka koit ka khïah, u Myntri Rangbah kim don jing-sngew synei ïa kine kiba poi hospital, kiba shah thngan bad kiba lah ban duh kam. La dei ban kiar ban shim jingkit-khlieh lada ym lah ban treikam”.
Halor ka jingkren u Bah Prestone Tynsong, Symbud Myntri Rangbah ka Jylla uba la khot ïa u General Secretary ka AICC in-charge Meghalaya, u Luizinho Faleiro ban ïa kren ha kamra halor ki skhim kiba la ioh pdiang da ka sorkar jylla na ka sorkar pdeng, u Dr Celestine u la ong, “Ngim donkam ban leit shong ha kamra jong-no jong-no lada ka pisa ka don hynrei ngim iohi ïa kita ki kam pynroi ha madan bad phim lah ruh ban shna surok sha ka ophis treikam jong phi”
Da kaba kyntha ïa ka National People’s Party (NPP) kaba lam khmat ïa ka sorkar Meghalaya Democratic Allïance (MDA), une u nongïalam Congress u la ong,”Ha shuwa ban leit Bangladesh ki lah dei ban pynthikna ha kano ka nongrim ka NPP ka ieng ban ban pyrshah ïa ka CAB. Ka dei ka juh ka party ba ong ngin ai ka ‘work permit’ ïa ki briew ba wan na Bangladesh”.
Ki nongkyrshan bad nongïalam ba ha khmat jong ka party Congress kiba la ïa mih ban shim bynta ha ka jingïaid ïakhih pyrshah ki long hapoh ka shispah ngut bad ki MLA kiba la ïa poi ki sha kane ka jingïaid ki long u Bah Himalaya M Shangpliang, Bah PT Sawkmie, Dr Azad Saman bad ki MDC ba kynthup ïa u bah Bajop Pyngrope, u Bah Carnes Sohshang bad u Bah Charles Marngar.