Press "Enter" to skip to content

Jah rngai u samla Khasi ha Coimbatore ba shah shukor ha ka kompani thok

Shillong, Naiwieng 09: Uwei u samla Khasi na Nongthymmai, Shillong, ula jah rngai ha Coimbatore, Tamilnadu hadien ka jingshem ba ula shah shukor bad poi trei ha ka kompani thok kaba leh ïa ki kam thok ban khit ïa ka kamai kajih u paidbah.
Une u samla Khasi u kyrteng u samla Amon D Kharsatia ba 24 snem ka rta. uba dei u khun jong i kong Sweety Kharsati ba shong ba sah ha Nongshiliang (Block-4), Nongthymmai.
Kat kum ka ejahar bala mudui da i Kmie ( Kong Sweety) sha u Commissioner of Police, Coimbatore la pyntip ba u samla Amon Kharsati ula leit trei ha kawei ka call centre ha Coimbatore hynrei tang hadien katto katne sngi ula shem ba kane ka call centre ka dei jong ka kompani thok, kaba ju leh ïa ki kam thok da kaba pan ïa ki Bank Account Number jong ki riew paidbah.
Ha ka ejahar, la pyntip ba u samla Amon Kharsati ula mih na Shillong ban leit trei sha Punjab namar ka jingïohkam ha ka Call Centre jong ka kompani Amazon kumba la kular da u paralok bala tip kyrteng u Jason Marbaniang.
I Kong Sweety i ïathuh ba hadien artatien ba u trei ha Punjab ula ïakynduh ïa uwei pat u briew uba la tyrwa ïa ka kam ba kham biang hapoh ka call centre ha Coimbatore. Hynrei hadien ba u poi ha Coimbatore bad bala trei katto katne sngi, ula shem ba kane ka jaka trei ka dei jong ka kompani thok kaba shukor ïa ki paidbah da kaba pan ïa ki Bank Account Nombor. I Kong Sweety i pyntip ba hadien ka jingsngewthuh ba ka jaka trei kam long satia kaba shngaiñ, u samla Amon ula kwah ban mih noh na ka kompani.
“Haba pyntip ïa ki (kompani) ba un ieh noh ïa ka kam, kim shym la shah satia ïa u ban iehkam bad kila kynnoh pynban ïa u ba u tuh ïa ki tiar jong ka Ophis bad kila shoh ruh ïa u nalor ka jingdawa ban siew T. 20,000 ka pisa ha ka Bank Account jong u paralok u Jason Marbaniang A.C.No. 20368169380” ong ka ejahar. I Kong Sweety i ong ba ka jingiateh kular ka long ba hadien ba u siew ïa ka T. 20,000 ïa ka jinglut jingsep ba kila kam, kin sa pyllait noh ïa u Amon da kaba suk. Hynrei la ong ba kine ki briew mar kumta hi, kila knieh noh ïa ka mobile phone jong u, ka ID Card, ka Aadhar card bad kiwei kiwei ki kot ki sla jong u.
Ine i Longkmie i pyntip ba ha ka step 9 tarik Naiwieng ha ka por 3 baje eiei, ila ïoh pdiang ïa ka phone call na u paralok jong u Amon ba pyntip ba ha ka jingtieng, u khun jong i (Amon) ula ïoh phet na kane ka jaka bad naduh kane ka por ym shym la don jing tip shuh shano ba u don.
I Kong Sweety ila kyntu ïa une u Heh Pulit ka Bangaluru ban iarap pynwad lem ïa u khun bad ban leh eiei halor kane ka kam. U Bah David Kharsati, MDC barim ka Sohryngkham bad Heh ka BJP ha Jylla, uba dei ru u Kñi Rangbah bad President ka Kur Kharsati, u pyntip ba ïa une u samla la lap hynne ka janmiet hapoh Tamilnadu.
U Bah David u pyntip ba ïa une u samla la lap da ki paralok jong u kiba dei ki nongtrei ka RSS hapoh ka jingïalam u Ramanathan, kiba la iarap ban pynwad lem ïa une u samla naduh ka sngi ba u jah.