Press "Enter" to skip to content

Jur ka jingshalan ïa ki syntiew dieng ha ki katto katne ki bynta ka WKHD

Nongstoiñ, Naiwieng 9: La kumba katto katne snem ki syntiew dieng kiba don ha ki khlaw ha West Khasi Hills, ki la ïaid ïew bha bad ha kine ki sngi la kham ñiar ban dang lap ïa ki ha ki khlaw ki btap khamtam ha ki katto katne ki bynta jong ka thaiñ Lyngngam bad Muliang. Kitei ki jait syntiew dieng ki don bun jait ïa kiba ym shym la tip kyrteng satïa ha ka ktien Khasi, hynrei ha ka ktien phareng la tip kum ki Orchid.
Ha kine ki sngi u nongthoh khubor haba poi ha ki thaiñ Mawlan la lap ba ki riew paidbah, ïa kitei ki syntiew dieng ba ki la kheit na ki khlaw ki la buh ter ha ka surok namar ba lada ïuh ki kali ki kham rkhiang kloi. La lap ruh ba ki don kiba dang shu wanrah na khlaw kiba dang set ha ki byrni.
Ha u snem ba la dep, la don kiba ïathuh ba ka dor thied naduh kitei ki jaka ka ïapher namar ki don ha la ki jait bad ki ong ba ki don kiba ki thied ha ka dor shispah sanphew haduh arspah tyngka shi kilo. Ki don pat kiba ki thied ha ka dor san phew haduh phra phew tyngka shi kilo.
Haba phai ha katei ka jingshalan bad pynïaid ïew ïa kitei ki jait syntiew dieng, u dak jingkylli u ba heh bha u mih ïa ka tnad treikam jong ka sorkar jylla kaba peit ïa ka khaïi ka pateng bad ruh ïa ka Khasi Hils Autonomous District Council (KHADC), ba hato ka jingkhaïi ïa kitei ki jait syntiew dieng ka long beaiñ ne em.
Kumba ka long ha ki snem ba la dep, ki mar khlaw kiba ïaid ïew bha ki don bun jait ba kynthup ïa ki snep dieng kiba ki ju thied ha ka dor ar tyngka, haduh san tyngka shi kilo. Hynrei uwei na ki mar khlaw uba rem dor tam u dei u Ginseng ba ki ju khot u soh bseiñ, u ba ki nongkhaïi ki ju thied haduh phra spah tyngka shi kilo, hynrei utei u jait jingthung ha kine ki sngi u la duh jait syndon.
Kaei kaba donkam ha kaba ïadei bad katei ka jing pynïaid ïew ïa kitei ki jait mar khlaw, ka long ba ki bor sorkar ki la dei ban peit bnïah khang ba ki jingthung jingtep kiba don ha ki khlaw ki btap kin ym duh jait.