Press "Enter" to skip to content

Kem ka ANTF ïa 2 ngut ki nongkhaii drugs kynthup u samla pule ka ICFAI

Shillong, Naiwieng 09: Ka kynhun ki Pulit Anti Narcotics Task Force (ANTF) kila ïoh ban kem ïa arngut ki snar nongkhaii droks ka Nongbah Shillong kynthup ïa uwei u samla pule ka ICFAI University.
Kat kum ka kyrwoh na u Superintendent of Police (City) ka East Khasi Hills Bah Steve A Rynjah , ka kynhunANTF bad ki Pulit Special Party ka Shillong sadar Police Station kila ïoh ban kem shuwa ïa uwei u nongkhaii droks ha ka jingpynap ship myn ha ka janmiet sngi palei ha ka thaiñ Khyndailad, Police Bazaar.
“Ka kynhun ANTF bad ka Special Party kila ïoh jingtip ba don uwei u nongkhaii drok ha Khyndailad. Kine ki kynhun kila buddien bad kila ïoh kem ïa u da kaba suk” ong ka kyrwoh haba pyntip ba une u nongkhaii droks u dei uba la tip kyrteng u Lobkush Bohara uba dei ruh u samla pule BA English ha ICFAI University, Shillong.
Une u Heh Pulit u pyntip ba ha ka jingtalasi ïa u Lobkush, ka kynhun ANTF kala ïoh ban kurup haduh 5.93 gram u heroin. U pyntip ba ka kynhun kala kurup ruh ïa kawei ka kali Alto ML05-H-8738 bala pyndonkam da une u samla, uba ju ïaieid paralok bha ruh bad uwei u nongkhaii drok ba kyrteng u Haleem Miah, uba la shah kem dang shen na Nongthymmai.
Ka kynhun ANTF kala register case ïa une u nongkhaii droks hapoh ka Shillong Sadar Police Station bad la pynngat ïa u hapoh ka kyndon 21(b) jong ka NDPS Act 1985.
Ha ka sngi kaba bud (sngi thohdieng), halor ka khubor ba ïoh na ka Tnad syntiat ka Assam Rifles, ka kynhun ANTF kala pyn long ïa ka jingkhynra hangn eha Nongbah bad kila ïoh ban kem ïa uwei u snar nongkhaii droks uba kyrteng u Rahul Das. Na une u briew la ïoh ban kurup ïa u droks ba khia 119.48 gram.
Kat kum ka jingïathuh u Bah Steve, uwei u snar nongkhaii ba kyrteng u Imran Mynthlu ula lait salit na ka kti jong ka kynhun ANTF ha kane ka jingkhynra Ka jingthwet ïa une u nongkhaii droks kala ïaid shaid shaid bad ki Pulit kila kyntu ïa k paidbah ba kin ai jingtip lem lada ki ïohi ïa une u briew.
Une u Heh Pulit u pyntip ba ka kynhun ANTF kala register case ïa kine baroh arngut (Rahul Das bad Imran Mynthlu) hapoh ka Lumdiengjri Police Station bad la pynngat ïa ki hapoh ka kyndon 21(b) jong ka NDPS Act 1985.
U Bah Steve u ong “Na ka daw ka jingjur ka jingshah kurup droks ha ki por bala leit, ki nongkhaii mynta kila pynkylla ïa ka buit da kaba sangeh ban wanrah bun u droks. Ha baroh kine ki artylli ki case, la shem ba ïa u droks la wanrah na Guwahati da kine ki briew ba shah kem”.