Press "Enter" to skip to content

Kwah ka Forever Young ban ithuh noh ïa ka jingshna Wine

Shillong, Naiwieng 09: Ka tamasa pyni ia ki jait wine bapher bapher, ka Shillong Wine Festival, ba la shna hi da ki kynhun, ki riew shimet ha ka jylla Meghalaya la pynlong ha ka sngi saitjain ha State Central Library. Ia kane ka tamasa la pynlong daka Forever Young ha ka sien ba 16 mynta u snem ryngkat ka jingthmu ban kyntiew ia ka kam jngoh-kai pyrthei bad kyntiew ia ka ioh ka kot ki nongrep soh.
Ha kane ka tamasa ki nongshna wine ki la wan ban pyni ia ki jait wine kiba la shna na ki soh bapher bapher. U President ka Forever Young, u Bah Micheal N Syiem, u la ong ba kum ka kynhun hi ka kwah ba kane ka jait jingdih yn ithuh noh ia ka da ka sorkar jylla.
“Ngin sa leit kynduh ia u Myntri Rangbah ka jylla Meghalaya, u Conrad K Sangma, ban ia kren halor kane ka bynta khnang ba kan long ka jingiarap na ka bynta ki nongrep roh kiba lah ban pynkylla ia ki soh sha ka jingdih wine”, u la ong.
“Mynta la kham bun ki ba shna wine bad hynne don i Microbiologist iba wan shim nuksa ban pule bniah ha kaba ia dei bad ka jingkhuid. Na kane ka kaiphod ngin sa leit kynduh ia u Myntri Rangbah ka Jylla Meghalaya”, la ong u Bah Michael.
U la ong ba mynta ban pynlong ia kane ka tamasa ruh la shu ioh Bar Licence shi por bad lada ithuh noh da ka sorkar kan pyn-myntoi shibun. “Ha nongkyndong lei phi ïohi ki shu bret kai ia ki soh bad lada shim jingithuh noh da ka sorkar kan kyntiew ia ka tnad Horticulture kumjuh kan don ka lad ioh kam ioh jam”, u la ong.
“Ngi shu leh hi da ka Forever Young ia kane ka tamasa bad ngim don ka jingiatrei lang bad kano kano ka tnad. Ngi la khot ia u Myntri Rangbah ban wan ia don ryngkat hynrei um lait hynrei u la ai pat ka jingkular ba un shim khia ban pyniaid sha khmat ha kaba ia dei bad ka rukom pynmih wine”, u la ong.
“Ngi kwah ban pyni ia ki wine ba la shna da ki nongshong shnong ka jylla ha ki Wine Store bad namar ia ka Beer la shah ban shna bad kumta ngin ia kren bad ka sorkar halor kane”, u la ong da kaba khmih lynti ban ioh ia ka jingmynjur.