Press "Enter" to skip to content

Rai ki nongtrei EMRI ban sangeh noh ïa ka jingïakhih shah thngan

Shillong, Naiwieng 09 : Ki nongtrei jong ka GVK EMRI hapoh ka lama jong ka Meghalaya EMRI Workers’ Union ki la rai ban weng noh ïa ka jingïakhih da kaba shah thngan naduh ka 11tarik mynta u bnai.
“Ngi la rai ban sangeh noh ïa ka jingïakhih jong ngi da ka rukom kaba jai jai namar ka paw kumba ka sorkar ka kwah ban pyni da ka bor,” ong u President ka kynhun, u Bah Roipar Kharraswai ha kane ka sngi Saitjaiñ.
Katei ka kynhun jong ki nongtrei 108 ki la shim bynta ruh ha ka jingpyrshah jong ka Meghalaya Pradesh Congress Committee ban pyrshah ïa ka rukom synshar bym dei jong ka sorkar BJP ha Delhi.
U la ong ruh ba ha ka jingkynduh lang ryngkat bad u Myntri ka tnad ka Koit ka Khiah ha ka 01tarik u Naiwieng, u Myntri u la kular ïa katei ka kynhun ki nongtrei kumjuh ïa ka FKJGP ba kin kyntu ïa ki bor pynïaid jong ka GVK EMRI ban don ka jingïakynduh lang halor katei ka bynta.
“Hynrei ka la ïaid mynta la phra sngi ei ei khlem pat don satïa kano kano ka kyntien na u,” la kynnoh u President. U la ong ruh ba na kaei kaba paw, u Myntri ka tnad ka Koit ka Khiah ka Jylla um da pyrwa than shaphang ki nongtrei EMRI.
La kynnoh ruh ba ha kine ki shisnem ba la dep, ki la ïaid ïa katei ka jingïakhih da ka rukom kaba jai jai ha kaba ki la pynkut da ka jingshah thngan ba khlem buhpor kaba la sdang naduh ka 29tarik u Risaw mynta u snem.
La ïathuh ruh ba haduh mynta kumba 14 ngut ki nongtrei jong ka Union ki la poi hospital na ka daw ka jingïakhih da kaba shah thngan.
Na ka liang ki bor pynïaid jong ka GVK EMRI ha ka 01tarik u Naiwieng ki la pynbna bad ai por 7 sngi ïa ki nongtrei jong ka EMRI ba kin wan mih sha ophis lym kumta kin weng kam noh ïa ki.
Hynrei na ka liang u President u la ong ba watla katei ka jingai por ka la kut noh ha ka 08tarik Naiwieng hynrei kim pat ïoh pdiang satia ïa ka shithi beh kam.
Na ka liang ka Congress hapoh ka jingïalam jong u Dr. Celestine Lyngdoh President ka MPCC, la kynnoh ba katei ka jingbym shimkhia jong ka sorkar ban pynbeit ïa kitei ki kynrum kynram baroh ka pyni ba u Myntri ka tnad ka Koit ka Khiah kumjuh u Myntri Rangbah kim da khuslai than eh ïa ki nongtrei kiba ïakhih haduh haduh ban da poi hospital ruh.