Press "Enter" to skip to content

Sdang pynitynnad ka NHAI ia ka surok 4-lane ha Ri-Bhoi da ka jingthung dieng

Nongpoh, Naiwieng 09: Ka jingwan ka surok 4-lane ha Ri Bhoi ka la long shisha ka jingkyrkhu kaba khraw ïa ki paidbah ka jylla bad mynta ki la suk shisha ha ka leit ka wan bad kam ju don shuh kata ka jingdeng ki Kali ha ka surok bad mynta pat da ka jingthung dieng ka National Highway Authority of India hapdeng shi lynter ka surok la sakhi ba ka la sdang ban pynitynnad ïa ka surok bad ruh ka la long shi bynta kum ka jingïada ïa ka mariang da ka jingthung ïa kitei ki dieng hapdeng jong ka surokbah.
Kane ka jingthung dieng ka NHAI ha shi lynter ka surok la lap da u Nongthoh khubor u Mawphor uba la pyrshang ban buddien bad kaba dei ruh ban ai jingiaroh bad kaba sngewsih kumba la lap ka long ba ki paidbah kim pat don kata ka jingsngewthuh bad bun na ki dieng ba thung da ka NHAI la jynrat noh da ki riew shim kabu bad kim don ruh kata ka mynsiem ban ïa snoh kti lang na ka bynta ban sumar sukher ïa kitei ki dieng.
Kane ka jingthung dieng ka dei hi naduh na Jorobat ter ter haduh ha Umiam ba kut ka surok 4-lane bad la iohi ba ki dieng ba la thung ha ki katto katne tylli ki bynta jong ka surokbah la don kiba la kham heh bad ka la pynitynnad shi rukom ïa ka surok bad ruh ki don pat ki bynta ba ki dieng la phut ne jynrad noh da ki riew shim kabu kiba khlem don kata ka jingsngewthuh kumno ban ïada ïa ka mariang bad kaba pynitynnad ruh ïa kane ka surokbah hapoh ka jylla Meghalaya.
Katkum ka jinglap u Nongthoh Khubor kane ka jingthung ka NHAI ïa kitei ki dieng ha shi lynter ka surok la dei ban ai ka jingïaroh kaba khraw bad kum ki paidbah ki dei ban ai ka jingiatrei lang na ka bynta ban sumar ïa kitei ki dieng khnang bas hi bynta kan long ka jingiada ïa ka mariang bad shi bynta pat ban pynitynnad ïa kane ka surokbah kaba ki paidbah ka jylla ki la ioh kata ka jingkyrkhu ha baroh ki liang ha ka leit ka wan ym kum ha ki por bad ki snem ba la leit noh ba ki paidbah ki kynduh mawsiang ha ka leit ka wan.
Halor kane ka bynta, u Nongthoh khubor u la ioh ruh ban ïa kren bad u Chairman ka Ri Bhoi Tourism & Environmental Development Forum (RBTEDF), u Bah Plielad Tiewsoh u la ong ba kum ka Forum kaba don ka jingangnud ban kyntiew ïa ki kam jngohkai pyrthei ha ka District ka ai ka jingïaroh ïa ka NHAI kaba la thung ïa kitei ki Dieng namar kane ka long shi bynta ban pynitynnad ïa ka surokbah ha shi lynter naduh a Jorobat haduh ha Umiam bad shi bynta pat ka long ban ïada ïa ka mariang lyngba katei ka jingthung ïa ki Dieng.
U la ong ruh kum ka Forum ka buh ruh ka jingkyntu naduh ki paidbah haduh ki Dorbar Shnong ba hap ha shi lynter ka surokbah 4-lane ha Ri Bhoi ki dei ban buh ka jingmaham ïa ki paidbah Nongshong Shnong ba ki dei ban sumar sukher ïa kitei ki dieng bad ruh ban don kata ka mynsiem ban ïa trei lang na ka bynta ban pynheh pynsan ïa ki deing khnang ba kan long ka jingïada ïa ka mariang.
Shuh shuh, u la bynrap ruh ba kum ka Forum ka kyntu ruh ïa ka NHAI ba kan dang thung shuh shuh ïa ki dieng harud ka surok jong kane ka surokbah, namar ka jingthung ïa ki dieng ka dei kawei ka bynta ba donkam eh kumno ban ïada ïa ka mei mariang bad kum ka Forum ruh nangne shakhmat kan ai ka jingiatrei lag ban dang pynitynnad ïa kane ka surokbah kaba long ka jingkhring ïa ki nongwan jngohkai pyrthei, u la bynrap.