Press "Enter" to skip to content

Thmu ka Sorkar NDA ban wanrah biang ïa ka CAB ha ka Dorbar Tlang

Shillong, Naiwieng 09: Ka Sorkar National Democratic Alliance (NDA) ba lamkhmat da ka Bharatiya Janata Party (BJP) la kynnoh ba kala pynkhreh mynta ban wanrah bad mynjur noh ïa ka Citizenship (Amendment) Bill ha ka Dorbar Tlang jong ka Ïingdorbar Parliament.
Kat kum ka jingpynbna jong ka Ministry of Parliamentary Affairs, ka Dorbar Tlang jong baroh artylli ki Ïingdorbar Parliament ( Lok Sabha bad Rajya Sabha) kan sdang naduh ka 18 tarik Naiwieng bad kan bteng haduh ka 13 tarik u Nohprah.
Ka khubor ba iajan bad ka sorkar Meghalaya Democratic Alliance (MDA) ba synshar ïa ka Jylla, ka ïathuh ba ka BJP kala pyn khreh ban wanrah noh ïa ka CAB ha kane ka Dorbar Tlang ban ïoh ïa ka jingmynjur na baroh artylli ki Ïingdorbar Parliament.
Ki Heh ka All India Congress Committee (AICC) ba wan iuhkjat ha Jylla mynta ka taiew ba kynthup ïa u Jairam Ramesh MP ka Rajya Sabha bad u Luizinho Feleiro, kila kynnoh ba ka BJP kan pyrshang
katba lah ban pynlong aiñ noh ïa ka CAB.
Watla ngim don ïa u nombor ban khanglad ïa ka BJP ba kan wanrah bad mynjur ïa ka CAB hynrei kum ka Party kan ieng pyrshah beit halor ka nongrim ba kane ka Bill ka dei kaba ïaidi pyrshah ïa ka Riti Synshar ka Ri.” ong u Jairam Ramesh.
Lah ban kdew ruh ba u Myntri kam pohïing ka Ri u Amit Shah, uba dei ruh u President ka BJP dang shen ula ong ba ka sorkar pdeng kan sa pynlong ïa ka jingïasyllok bad baroh ki Jylla jong ka thaiñ Shatei Lam Mihngi hashuwa ban wanrah ïa ka CAB hapoh ka Parliament.
U Myntri Rangbah ka Jylla Conrad Kongkal Sangma dang shen ula ïakren bad u Myntri kam pohïing ka Ri halor ka jingdon kam ban pynlong ïa ki jingïasyllok bad ki kynhun bapher bapher ban ïoh jingmut haba ïadei bad ka CAB.
Ka thaiñ Shatei Lam Mihngi ka Ri kala sakhi ïa ka jingïakhih jong ki kynhun bapher bapher ban pyrshah ïa ka jingthmu pynlong aiñ ïa ka CAB, kaba thmu ban kheiñ nongshongshnong ba pura ka Ri ïa ki phetwir na Bangladesh, Pakistan bad Afghanistan.
Ka Jylla Meghalaya ruh kala sakhi ïa ka jingïakhih ki kynhun sengbhalang ban pyrshah jur ïa CAB bad kila dawa ïa ka sorkar pdeng ba ka dei ban pynduh pyndam shisyndon ïa kane ka bill.
Ka seng North East Students Union (NESO) kala pyntip ba kan sa sdang biang ïa ka jingïakhih ban pyrshah CAB naduh ka 18 tarik u Naiwieng kaba dei ka sngi ba sdang ka Dorbar ha Parliament. Kane ka jingïakhih kan pynlong ïa kane ka jingïakhih ha baroh ki Jylla ka thaiñ Shatei Lam Mihngi, ban phah ïa ka khubor sha ka Sorkar Pdeng ïa ka jingpyrshah jong ka thaiñ.