Press "Enter" to skip to content

Ka kyiad bad u briew

Rangbah A.Kharpran

La pynlong ïa ka Kyiad da ki bin bin ba long um bad ba sngur kiba long bih. Dei na kane ka daw ba u la pyndonkam ïa ka ha kaba khleh dawai dashin. Bun jait ki dawai phareng bad dawai Khasi la khleh lang ïa ki bad khyndiat ka kyiad. Ki kyiad ki don bun jait bun kyrteng, ka kyiad kaba ki ïa dih barabor ka dei ka ‘Ethyl Acohol ne Ethanol’ kaba kham duna ka jingkhlaiñ ka bih (less poisonous) hynrei kaba long bih hi bad kaba pynïap hi lada dih bun dih kyrni ïa ka.
Ka jingdih kyiad buaid ka ktah ïa ka koit ka khiah jong u nongdih, ka ktah ïa ka burom ka ijot jong u,ka ktah ïa ka ïing ka sem, ka ktah ïa ka shnong ka thaw, ka ktah ïa ka shongsuk shongsaiñ jong ka imlang sahlang bad ka ktah ïa ka ïoh ka kot jong ka ri bad ka jaidbynriew baroh. Shibun bah ka spah ka phew la pynlut sepei ha kaba thied kyiad, ha kaba ai jingsumar ïa kiba pang na ka dih kyrni pathar ïa ka kyiad bad ha kaba siew ïa ki jingduh jingjot, jingmynsaw bad jingïap kiba mih na ka jingdih kyiad khlem akor. Da ki hajar shisnem la duh ei ïa ki mynsiem briew bad da ki hajar hajar ki kylla dkoh, kylla anna bad im jynjar shirta kiba mih na ki jingtakhuh bad jingkylla ki kali na ka daw ba ki ïa dih kyiad khlem akor ki nongñiah. Bun bah ki khun anna la kha ha ka pyrthei na ki kmie ki kpa kiba dih kyrni ïa ka kyiad bad ka jingdih kyiad buaid tanglang jong ki kmie ki kpa ki pynsniew ïa ka longbriew manbriew jong ki khun ki ksiew. Hooid ka Sorkar ka kamai lada kheiñ kyllum lut ïa ki jinglut jingsep ban buria ïa ki jingdih kumba la kdew lyngkot haneng ki jinglut ki kham bun ban ïa ki jingmih.
Katto katne ki jingshisha ba ngi dei ban tip, ba ka um ka don kumba 55% -65% ha ka met u shynrang briew bad 45-55% ha ka met jong ka kynthei briew. Namarkata ki kynthei ki dei ma ki kiba kham buaid kloi ban ïa ki shynrang wat lada ki dih mar katjuh bad ki ïa ryngkat ha ki jingkhia ka met. Bun na ki nongdih kim tip satia ba ka kyiad ka dei ka bih kaba wanlam bun jait ki jingpang bampong jong ki snier bad haba la dih kyrni palat ki lah ruh ban ïoh ïa ka jingpang bampong ba shyrkhei jong ka ktien (mouth) tyngkro, ryndang, kpoh bad kiwei kiwei ki bynta jong ka met u briew, ka long ruh kaba ma bad kaba kham sniew ar shah lada ki dih duma bad bam duma ha ka por ba ki dih kyiad, ha kaba shibun eh ban dih lang ïa ka kyiad bad ki dawai baïong khlieh, dawai kynja pangmet,dawai pynïoh thiah bad kiwei kiwei ki dawai pynbuaid, namar haba kine ki dawai ki ïoh khleh milai bad ka kyiad ki lah ban kylla bih, kaba pynmynsaw bad pynïap duh artad ïa u briew. Ka jingdih kyiad kam tei ei ei ruh em ïa ka met bad kam ai jingmyntoi ei ei ruh lait noh tang ka jingpynsyaid ïa ka met. Ia ka kyiad la kjit mar mar sha ka met na ki ñierlang tang mar ïa dep dih bad u briew u sdang kylla buaid haba ka kyiad ka la don kumba 1% na ka jingdon jong ka snam ha ka met briew. Ka kyiad ka pynduna ïa ka bor sngew ïa ka jingpang, kata, haba u briew u la buaid, ka pyntlot ïa ka bor sngewthuh jong ki jingmut jingpyrkhat bad dei na kane ka daw ba bunsien u briew u hap bad ngop ha ki pop ba shyrkhei ha ka por ba buaid bad shano shuh yn babe haba la shet u khawiang. U briew uba la buaid kyiad u ïaid padai sheng sheng shane shatai bad ka long kaba ma shibun ba un ñiah kali. Ki dak ki shin kiba sah hadien ba u la buaid ki long ka jingktah ka khlieh, ka jingset kpoh bad ka jingjrem jong ka met ka phad.
Haba shu batai lyngkot ka kyiad ka wanlam bunbah ki jingsniew,kaba ktah ïa ka longbriew manbriew shimet shimet, ïa ka koit ka khiah, ka pynhiar dor ïa ka maiñ rangbah maiñ kynthei ïa ka burom ka ijot ka ktah ïa ka longïing longsem ka ïoh ka kot ka roi ka par, ka wanlam ïa ka huri hura ha ïing ha sem, ha shnong ha thaw bad ka ktah jur ïa ka imlang sahlang baroh kawei. Ka jingdih kyiad ka pynsuki ïa ka rukom treikam ha ki ophis sorkar bad ki pynduna ïa ki jingmih ha ki karkhana. Ka lawei u nongdih ka long kaba dum bad kaba ngiew. Ngim nud ban ong ba u briew uba la ngop bad kyrni ban dih kyiad mynmiet mynstep u dei u briew uba la jot la rem bad uba la duh jingkyrmen bad dei sa tang ka jingïap kaba ap ïa u ba kan wan rong noh. Ka kyiad ka dei ka bih te shaei keiñ kin khih ki nongdih tang ka jingïap keiñ kaba ap!.
Mynta pat to ngin ïa phai sha ka Kitab Bakhuid ka Bible kumno ka batai shaphang ka kyiad, ïa ka kyiad la pdem bad shet nyngkong da u Noah uba la buaid hadien ba u la dih ïa ka, u la thad burom ruh ïalade ha khmat ki khun da kaba thiah lyngkhuit lyngkrang ha ïing jaiñ. Jenesis 9:20-23 U Noah, uba dei u nongrep, u la long u briew uba nyngkong ban rep ïa ka brisoh waiñ. Hadien ba u la dih katto katne ka wain u la buaid, u la loit noh ïa ki jaiñphong jong u bad u la thiah lyngkhuit ha ka ïing jaiñ jong u. Haba u Ham u kpa jong u Kanaan u la ïohi u long u lyngkhuit u la leit shabar ban ïathuh ïa ki hynmen jong u baroh arngut. Te u Shem bad u Japhet ki la shim ïa ka jaiñ kup i la ïarah shadien halor ki tyrpeng. Ki la ïa ïaid kynran da dien shapoh ka ïing jaiñ bad tap ïa u kpa jong ki, da kaba phai lyndet ban ym ïohi ïa ka jinglyngkhuit jong u.
Ka kyiad ka wanlam tang ki jingjynjar bad ki jingsngewsih suda ïa kito kiba dih kyrni palat ïa ka. Ka Kitab jong ki kyntien Stad (Proberb) ka long kumne 23:29 35. “Pyni ha nga ïa ki briew kiba dih kyiad bhor mutlop, kiba pyrshang ban dih ïa ki katto katne ki jingdih ba thymmai, bad ngan pyni ïa phi ïa ki briew kiba shem sngewsih ïa ki hi barabor kiba pynjynjar bad barabor kiba thnum, ki khmat jong ki, kiba saw snam bad ki don ka jingjngem kiba ha ka jingshisha kim dei ban don. Wat shah ïa ka waiñ ba kan pyni bang ïa phi ,watla ka saw i bang bha, bad thaba hapoh ka khuri, bad ka tuid pynjlih jem jai shapoh. Ha ka step kaba bud phin sngew kumba la shah dait ne shah puh ha u seiñïong. Ki jingïohi ïa ka dur ba khyllah kin paw ha ki khmat jong phi, bad phim lah ban pyrkhat ne kren shai, phin sngew kumba phi don ha duriaw, ba pang ha ka leit jingleit duriaw, ba shad kynting shajrong halor tnum jong ka jhad ba shad kynting shane shatai. “Ngi la dei ban shah shoh, hynrei ngam kynnmaw ïa ka. Balei ngam lah ban khie? Nga donkam ïa ka ‘iad phler step.
Ka jingdih kyiad kyrni ka wanlam ïa ka jingduk jingkyrduh, ka Proberb 23:21 ka kren kumne ‘Ki nongbuaid bad ki riewlalot kin kylla long kiba duk ba kyrduh. Lada phi shu bam shu thiah, shen shen phin hap ban phong da ki jaiñ jot.” Ka jingkordit kan wan lap ïa kito ki briew kiba la ngop ha ka dih kyiad buaid .Isaiah 5:11 ka ong kordit ïa phi! kiba khie dang step ban sdang dih kyiad, bad ïa phi kiba ïa shong dih kyiad buaid ban da miet.” 5:22 “Kordit ïa phi ki riewshlur jong u bilor ïong! Bashlur bad bym ju sheptieng ha ka ban pynkhleh kyiad.
Ka jingdih kyiad ka pynlong ïa ki nongdih kiba heh nia blab blab bad kiba bieit. Ka Proberb 20:1 ka ong “Ka jingdih kyiad palat ka long ïa phi uba heh nia bad uba bieit. Ka long kaba khlem akor ban dih buaid.’ Ka jingdih kyiad ka pynkulmar ïa ki jingmut jingpyrkhat bad ka pynlong ïa u briew ban leh bakla ïa ka Ktien U Blei katkum u Hosia 4:11 ka ong kumne “U Trai U ong “Ka waiñ baroh ar barim bad bathymmai ka lute noh ïa ki briew jong nga ïa ki jingsngewthuh jong ki.” Ka kmie jong u Syiem Samuel ka ong Proberb 31:4 “Sngap, Samuel ki Syiem kim dei ban dih ‘iad soh ne ban thrang ïa ka ïad rod. Haba ki dih ki klet ïa ki aiñ ki kanun bad ki kyntait ïa ki hok jong kiba duk.”
Ka kyiad ka lah ban ai jingtngen bad jingsngewbha shipor bad dei na kane ka daw ba ka Proverb 31:6 ka batai ïa ngi kumne “Ka kyiad ka dei na ka bynta kito kiba la jan ïap, na ka bynta kito kiba shem jynjar. Ai ïa kiba kin dih bad ban klet ïa ka jingkyrduh bad ïa ka jingbym suk jong ki.
Bun ki briew kiba pynksan jubor ba ka kyiad kam long kaba sniew. Hooid haba shitom ne pang ngi lah ban dih khyndiat khyndiat kumba dih dawai. Bun ki dawai ba la khleh lang bad ka kyiad. 1 Timothi 5:23 ka ong, “Wat dih tang ka um suda, hynrei shim khyndiat ka waiñ ban ïarap ïa ka jingtylliat ka kpoh jong me, namar ba me shait ïoh pang bunsien bunsien, “Ban ong ba ka jingdih buaid ïa ka kyiad kam long kaba sniew ka long kaba bakla shibun. Hahum 1:10 ka ong “Kum ki shiah kiba ïathaiñ bad kum ki jyntang ba la tyrkhong ïa phi ki nongbuaid yn sa thang duh noh.
Hangne ngi ïohi shai kdar ba ka jingstad da tip bad ka Kitab Bakhuid jong U Blei ka Bible ki kubur bad pynshisha ba ka kyiad ka dei ka jingdih ba sniew, kaba pynjynjar bad pynïap lada dih kyrni ïa ka. Baroh ar ki kdew shai ba ka jingdih kyrni buaid ïa ka kyiad ka ïalam sha ka jingjot thiaw, ka wanlam ïa ka duk ka shipa, ka pynpait pynpra ïa ka longïing longsem, ka wanlam ïa ki jingpang ba har rukom, ka pynmih ïa ka huri hura, ka pynsyrwa ïa ka spah ka phew, ka thad burom ïa u nongdih bad ïa ka ïing ka sem, ka pynmih ïa ka jingmynsaw bad ka jingpyntip ïa kiwei, ka jingïap ka ap ïa ki nongdih, bad ka jingdih kyiad ka pynngop pynliat ïa u briew sha ka bamsap, ka awria bad ki jingbakla bym poi pyrkhat satia. Dei na kine ki daw ngi dei ban kiar kyndiah raimaw rai dieng na ka jingdih kyiad buaid tanglang kaba ïalam ïa ngi sha ka lynti jong ka jingjot bad jingïap ba duh jingkyrmen. ( 13 Tarik Risaw,2000)