Press "Enter" to skip to content

Wanrah burom u samla Jaki Trang ïa ka Ri-Bhoi na ka Shillong Endurance Motorsports Challenge 2019

Nongpoh, Naiwieng 18: Ka long ka jingsarong kaba khraw ïa ka district hi baroh kawei ha kaba u wei u samla ñiah kali u ba la tip kyrteng kum u Jaki Trang u ba la leit ban mih khmat ïa ka Ri Bhoi Motor Sports Club (RBMS) u la ioh ban rah ïa ka kyrdan ba nyngkong ha ka jingïakop ñiah kali bala tip kum ka Shillong Endurance Motorsports Challenge 2019 kaba la pynïaid da ka Shillong Endurance Motorsports Club ha ka jingïatreilang bad ka Meghalaya Aids Control Society, Shillong kaba la long naduh ka 14 haduh ka 16 tarik Naiwieng ha Iew Shillong, Umtyngar.
U tei u samla u la jop ruh ïa ka kyrdan ba nyngkong ha ka Category 2 Stroke Expert jong katei ka lympung ïakop ñiah kali kaba dei ruh ka sienjam kaba 3 kaba long ruh ka jingai hikai ïaki samla kiba ngat haka jingpang HIV, kaba dei kawei naki jait jingpang kaba ma bad ba la sdang ruh ban kynrei ha kane ka jylla.
Halor katei ka jingjop naka liang u Bah Isynei Hinge President ka RBMSC u la pynpaw ka jingsngewkmen kaba khraw bad ai ka jingkhublei ba kyrpang ïa utei u samla u ba la wanrah ka nam bad burom ïa ka district na katei ka lympung bad ïa 3 ngut kiwei pat ki samla ba kynthup ïa u Banjoplang Umbah, Nil Dhar bad u samla Banshan Sohtun kiba la leit ban shim bynta ha katei ka lympung watla kim poi shaka thong, hynrei naka liang jong u u ai ka jingkitbok kitrwiang naka bynta kitei ki samla ba kin dang trei shitom shuh shuh bad kim dei ban duh mynsiem.
Naka liang u Bah Isynei Hinge u la kyntu ruh ïa utei u samla ba un dang pynkhreh bha shuh shuh ïalade naka bynta kiwei pat ki lympung kiba heh haka jylla bad wat shabar ka jylla bad air uh ka jingkhublei ba kyrpang ïa u Bah Alvin Naldo Nongkhlaw u ba ai jingiarap ïa ki dkhot ka Club ki ba leit shim bynta sha katei ka lympung.