Press "Enter" to skip to content

Bym don surok, da ka khoh hap kit ïa ki nongpang na thaiñ Rimen sha ki jaka sumar

Nongstoiñ, Naiwieng 24: Ka jingbym don ki surok kiba biang ha ka thaiñ rimen sepngi, kiba hap ha ka hima Rambrai ba kynthup ïa ki bun tylli ki shnong naduh Mawdet, Mawkhiat, Uma, Umshem, Rynñiaw, Mawiong, Domkyrkoh, Mainop, Mawshad, Marwa, Mawlong-bah, Pungphreit, Stepwan, Mawkhiatmihngi bad kiwei kiwei ki shnong ha katei ka thaiñ, ka la pynlong ïa ki paidbah jong kitei ki shnong ba kin ïakynduh shibun ki jingeh ha ka leit ka wan bad ka kit ka bah ban pynpoi ha kitei ki shnong.
Katto katne ngut ki Nongïalam shnong jong katei ka thaiñ haba ïakren bad u Nongthoh khubor, ki la ïathuh ba kitei ki shnong ki dei kiba jngai bha na ki jaka ba la don surok ha kaba hap ban ïaid da ka kjat da ki bun bun kynta.
Ki la ong ba ha ka por lyiur lei lei, haba don kiba pang ba shitom, la hap ban shu kit da u briew bad na ki shnong kiba kham jan kaba kloi eh ban poi ha ka jaka sumar kaba don ha Rambrai, ka long lai haduh saw kynta. Na ki shnong kiba jngai kum ha Umshem lei lei, la hap ban ïaid kjat haduh hynriew kynta kata lada khlem kit jingkit.
Halor kitei ki jingeh ba ki paidbah ki ïakynduh, ki nongïalam shnong ki la kyntu ïa ka sorkar ba kan phai khmat lem sha kitei ki shnong, khnang ba ki paidbah kin ym shitom palat khamtam eh ban kham kloi ha kaba kit ïa ki ba pang ba shitom ban pynpoi ha ki jaka sumar kum ha Rambrai PHC bad ha Nongstoiñ.
Ki riew rangbah ki la ïathuh ruh ba ki jaka ha katei ka thaiñ naduh Mawkhiat ter ter haduh Umshem, ki dei ki jaka ba ki soh ki pai ki mih bun bha bad kiwei kiwei ki jait jingthung ki dei kiba ïaid ïew.
Hynrei na ka daw jong ka jingbym don ïa ki surok kiba biang, kam don jingmyntoi ban thung bad ban rep.
Ki nongïalam shnong ki la kyrpad ba jur ïa ka sorkar ba kan pynpoi surok ha katei ka thaiñ, khnang ba ki paidbah kin ym sah ha ka jingeh shilynter jingim.