Press "Enter" to skip to content

Ka jingïalang ‘Tei ïa ka Lawei’ yn pynlong u bah Metbah bad ki samla pule

Jingïakob Thei Saikhyllong bad Rang Jymphong
Shillong, Naiwieng 24: U nongmihkhmat sha ka Iingdorbar thawaiñ na Mairang Constituency, u bah Metbah Lyngdoh u la pyntip ba un pynlong ïa ka jingïalang kaba kyrpang bad ki samla pule kiba pule ha ki kolej bad skul bah bapher bapher ha sor Shillong ha ka 12 tarik u Nohprah mynta u snem.
Kane ka jingïalang ban khot pynlong da u MLA ka Mairang, uba long ruh u Lamphang ka Ïing Dorbar Thaw-aiñ bad ki samla pule kadei kaba la ai kyrteng ‘Tei Ïa Ka Lawei’ bad yn pynlong ïa ka ha U SoSo Tham Auditorium.
Haba ïoh ban ïakren bad u bah Metbah, u la pynsngew ba u don ïa ka jingangnud jong u ban don ka jingïa-kynduh kaba markhmat bad ki samla pule kiba na ka Constituency jong u kiba don ha sor Shillong, kadei namar jong ka jingdawa jong ka por ba ki khun samla pule ha kane ka juk mynta ki donkam ïa ka jingai mynsiem ym tang na ki kmie ki kpa hynrei wat ruh na la ki nongmihkhmat khamtam haba ki jngai na la ki ïing ki sem.
U la ong ruh kane ka jingïakynduh kaba ai kyrteng ‘Tei ïa ka Lawei’ kan bteng na kawei ka por sha kawei pat, ka jingthmu kaba shadien kadei ban ai mynsiem ïa ki samla kiba long shisha ka lawei ym tang ïa ka Constituency hynrei ïa ka Ri Khasi bad Jaintia bad ka Jylla hi baroh kawei ba kin don ïa ka mynsiem shakri ïa ka Ri lade ynda ki la dep ban pule bad ban ïoh ïa ki kyrdan bapher bapher.
Ha ka jingïa-kynduh lang, na ka liang u bah Metbah u la pyntip ruh ba kan don ka jingïamir jingmut bad ka jingïa-phylliew jingmut bad ki samla pule kaba kin ïakren halor ka mat kum ka jingkyrduh kam, ka lynti ban pynduh ïa ka jingsniew kaba wan ban tyllep ha ka imlang sahlang khamtam ha ki samla, ka jingeh kaba ki ïa shem ha ki jaka pule bad kiwei kiwei.
Na ka liang, u bah Metbah u kyrpad sngew bha ïa ki samla pule ba kin wan ban ïa shim bynta khnang khnang ha katei ka sngi bad ban pyntip ïa ka jingwan jong ki da kaba ki phah sha ka Whatsapp account no. 7005696802 bad ruh ha ka Events Facebook Page Metbah Lyngdoh – ‘Tei Ïa Ka Lawei’ bad ruh lyngba ka Messenger.
Kum ban pynbyrngia pat ïa ki samla hadien ka jingïa-kynduh lang, katkum ka jingïathuh u bah Metbah, ha katei ka sngi kan don ruh ka jingïakob Thei bad Rang Bhabriew kaba ai kyrteng kum ka Thei Saikhyllong bad u Rang Jymphong, ka ban long ruh kum ka dak ban ai mynsiem ïa ki samla ba kin ithuh ïa la ki riam tynrai kiba na kylleng ka Ri Khasi Jaiñtia.
Ïa kane ka jingïakob thei bad rang bhabriew la aiti ban khmih ha iwei na ki nongsuh jaiñ tynrai ba la pawnam I kong Elizabeth Marbaniaidng ban pyntyllun ïa ka kam bad ruh ban hikai ïa ki samla kiba don jingthmu ban ïashim bynta.
Kiba kwah ban ïashim bynta ha kane ka jingïa-kob kin sngewbha ban pyntip ha une u nombor, 7005696802 da kaba phi shu telephon ne WhatsApp bad phah ïa ka kyrteng bad ka jaka sah jongphi ha shwa ka 3 tarik Nohprah. Ki ban shim bynta kin ïoh ïa ka jinghikai na i kong Elizabeth kumba san sngi eiei.
Kin don ruh ki samla nongrwai Khasi kiba dang shu paw pyrthei ki ban wan shim bynta ha katei ka sngi ban pyn-byrngia ïa ki samla pule kiba donkam ïa ka por jong ka jing-lehkmen bad ka jingleh sngewbha khamtam hadien ynda ki la dep ban pyndep ïa ka eksamin bapher bapher jong ki bad ruh kum ka jing-shong thait ha shwa ba kin leit pat ban leh ïa ki eksamin ha ki sdang bnai jong u snem ban wan.