Press "Enter" to skip to content

Pynlong prokram hikai ka Indian Oil halor ki tyndong lyer

Shillong, Naiwieng 24: Kum shi bynta jong ka prokram “Swachhata Hi Seva” ba la pyntreikam da ka sorkar India ha ka sngi saitjaiñ la pynlong ïa ka prokram ai jinghikai ha nongbah Shillong ha phyllaw ka ophis treikam ka Scouts and Guides.
Ha katei ka sngi la wan ïa shim bynta ruh da u Chief General Manager, Indian Oil AOD and Head of North East Marketing of Indian Oil, u Uttiya Bhattacharyya, u MB Manohar Roy, General Manager (LPG) Indian Oil ADO, u Bah RL Blah na ka liang ka Khasi Pnar Gas Agency, ki khynnah skul ka Pine Mount School (PMS), ki nonghikai bad kumjuh ki nong pyn-donkam ïa ka gas.
U kongsan ha kane ka sngi, u Uttiya Bhattacharyya, u la ong ba ki paidbah kiba pyndonkam ïa ka LPG haba ka poi ka tyndong ha iing ki dei ban ioh ïa ka tyndong lyer shet jingshet kaba biang bad kaba dap.
U la ong ruh ba ki nongwan sam ïa ka tyndong ruh ki dei ban thew ïa ka jingdon ka gas ha katei ka tyndong bad ki dei ruh ban khmih bniah lada ka tyndong ka don ne em ka jinglait lyer (leakage).
“Kane ka long na ka bynta ka jingïada ïa ki paidbah nong shim ïa ka tyndong lyer khnang ban pyn-thikna ba ka long kaba biang bad lada lap ba ka duna ki nong pyn-donkam ki lah ban pynphai noh ïa ka tyndong bad buh jingujor ruh sha ki nongsam ïa ka tyndong,” u la ong.
U la ïathuh ruh ba ha ka jylla Meghalaya ki don kumba 50 ngut ki nong sam LPG gas (distributer) bad ki don kumba palat 3 lak ki nong pyndonkam ïa ka gas hapoh ka jylla baroh kawei.
U Uttiya Bhattacharyya u la kyntu ruh ïa ki paidbah ban thung kham bun ki dieng khang ban wanrah ïa ka jingkhuid ka mariang bad ban lait na ka jing khluid ka pyrthei (global warming).