Press "Enter" to skip to content

Shah kem uwei u nongsiat mrad khlaw ha Narpuh Wildlife Sanctuary

Jowai, Naiwieng, 24: Katba ka tnad ka kam khlaw jong ka Jylla khamtam ka tnad Wildlife ka pyrshang katba lah ban ai ki jingïada ïa ki mrad khlaw bad ki jingthaw ba im ha khlaw ha Khlaw Narpuh Wildlife Sanctuary, hynrei ki dang don ki briew tang ban myntoi ïalade ki la leh ki kam beaiñ ban pynïap pathar ïa ki mrad khlaw kiba im bas ah ha katei ka khlaw.
U Range Officer Officer jong ka Umkiang Wildlife Range hadien ba ula ïoh jingtip ba don ki briew kiba siat mrad khlaw ha katei ka khlaw ryngkat bad ka kynhun jong u, ki la ïaid pahara ha katei ka khlaw naduh ka 19 tarik une u bnai.
Ha kane ka jingïaid pahara kaba la neh ar miet ha katei ka khlaw ha ka 22 tarik ha ka por kumba 8 baje mynstep ki la ïoh ban kem ïa uwei u briew ryngkat kaba doh Rynjang kaba ula de pot doh kaba khia haduh 20 Kilo.
Une u briew uba shah kem u dei uba kyrteng Laditsak Lungtau uba na ka shnong Khaddum.
U Range Officer jong ka Umkiang Wildlife Range marsien ïoh bat ïa une u nongsiat mrad ki la ïalam ïa u sha Khliehriat Range Office ban tohkit. Ha ka jingtohkit ïa une Laditsak Lungtau ula kubur baka doh kaba u kit kadei ka jong u Rynjang. Ula ïathuh ba la pynïap ïa une u Rynjang ha ka 21 tarik une Naiwieng ha ka por kumba 3 baje nohphaisngi.
Ka tnad kam khlaw hadien ba la pynbiang ïa ki jingdonkam jong ka aiñ ki la kem bad pyngngat ïa u ne u Laditsak Lungtau hapoh ka kyndon aiñ jong ka Wildlife (Protection) Act 1972.
La rah ïa u Laditsak Lungtau sha ïingbishar ha Khliehriat bad mynta u don hapoh ka Judicial Custody bad ka jingtian bishar pyrshah ïa u ka la ïaid skhmat.
Ka tnad kam khlaw (Wildlife) ka ong ba kane ka jingïohkem ïa ki nongsiat bad ka pynïap pathar ïa ki mrad khlaw ha Narpuh Wildlife Sanctuary kam dei ka sien kaba nyngkong. Bunsien ki briew kiba donkti ha kane ka jingsiat mrad ki dei kiba Khaddum. Ka tnad Kam Khlaw ka kyntu ïa ki paidbah kiba shong ba sah ha katei ka khlaw ban pynneh pynsah ïa ki mrad mreng ha katei ka khlaw bad ba kin sangeh ban siat ne pynïap pathar ïa ki mrad khnang ban kin ïoh jingmyntoi bad ban ai ka jingïatreilang bad ka tnad kam khlaw.