Press "Enter" to skip to content

U Lat u leh pyrshah ïa ka Sorkar

B.M.Lanong

Shillong: Haba u Lat Tathagata Roy ka Meghalaya uba la thung da ka Sorkar MDA u Prime Minister Modi, um sngap shuh ïa ka jingbthah ka Sorkar Meghalaya kaba sngewthuh jingmut lang bad ka Sorkar Pdeng, ka la wan shimti keiñ ka kynhun ba don bun ki MDC Congress ha KHADC, hynrei baroh lang, ka kynhun ka don 14 ngut, kumba don ka kynhun United Democratic Alliance (UDA) 14 ngut.
Kane ka jingdon 14-14 ngut ka la pawshai ha ka 20.11.19 haba la ïatynjuh bor ïa ka mat weng sorkar (No Confidence Motion) bad ha ka 22.11.19, haba la jied ki 14 ngut hi ïa u CEM thymmai, Bah Latiplang Kharkongor. Ka kynhun UDA kaba don 14 ngut kan shym ïashim bynta.
Ym sngewthuh shuh, kumno u Chairman Bah P.N.Syiem u thep vote lang ha ka 22.11.19, haba ka kynhun UDA kam shym leit shim bynta. La don tang kawei ka kynhun kaba la ïoh pura 14 ngut. Tip ha kano ka kyndon jong ka aiñ, u Chairman ruh u thep lang shi vote, haba ki riti pynïaid dorbar ba la kdew ka Article 100 jong ka Constitution of India, ka kren shai, ba u nongpynïaid dorbar u lah ban thep vote tang haba don ka jingryngkat bor.
Namar arsien ka jingïaleh ha KHADC kumba la kdew haneng, ka la paw 14-14. Na kata ka daw ka Sorkar ka la ai jingmut ïa u Lat ba un wanrah noh da u nongpeit shipor, u Administrator kumba ju leh hapoh ki kyndon trei kam, namar lymda don jingkylla da kumwei, kan eh ïa kano-kano ka kynhun kaba don 14 ngut, ha ka ingdorbar kaba 29 ngut (uwei ula khlad) ba kan trei kam.
U Lat uba la shah ban jur ha ka Seng Congress bad ki nongkyrshan ka Seng Congress, u la buh jingeh mynta ïalade, namar haba ula tip ïa katei ka jingïatan ryngkat bor, u la kyntait ïa ka jingai jingmut ka Sorkar bad u la ailad ïa ka kynhun ba don bun ka Congress ban shimti. Tip un leh kumno, lada ïatan tyllai sah kumne.