Press "Enter" to skip to content

Wat pyrkhat tang ïa ka shuki ne bor, peit ruh ïa ki khyndew ki shyïap: ong ka RBSU ia ki Politician

Halor ki kam pud kam sam ka Meghalaya bad Assam

Nongpoh, Naiwieng 24: Tang hadien ba ka Assam lyngba ka Karbi Anglong Autonomous Council (KAAC) ka la wan tei ïa kawei ka ïew ha ka Shnong Umlaper bad ba la dep ruh ban plie paidbah dang shen da u EM ka KAAC ha Umlaper kaba dei ka jaka ba dang ïa kajia pud hapdeng ka Meghalaya bad ka Assam, ka Ri Bhoi Students Union (Central Body) ka la ther tyngeh naduh ka sorkar jylla ka Meghalaya bad ruh ïa ka Khasi Hills Autonomous District Council (KHADC) ba kim dei ban pytkhat tang ban ïa khun ïa ka shuki bad ki dei ruh ban peit kyrpang ïa ka jingeh ki paidbah bad ruh kyrpang ban ïada ïa ki khyndew ki Shyïap jong ka jylla.
Kum ban pynkynmaw, halor kane ka jingwan tei ka Assam da ka iew thymmai ha ka Shnong Umlaper ba hap ha ka Raid Nongtung ha Ri Bhoi District, na ka liang ka bor District ba la ïalam da ka Magistrate bad ruh ki heh Pulit ki la leit ruh ban jurip dang shen ha ka Shnong Umlaper bad la sakhi ruh ba ka Assam ka la dep shisha ban tei ïa katei ka ïew ha kaba lah ba ong ba ka sorkar Meghalaya bad wat ka KHADC ruh kam don jingtip satia halor kane ka jingwan tei ïa katei ka ïew.
Haba ïa kren bad u Nongthoh khubor u Mawphor, u Working President ka Ri Bhoi Students Union, u Samla Amberlight Masharing, u la ong ba ka seng ka sngewbynniaw shisha halor ki jinglong jingman jong ki shnong ki thaw hapoh ki Shnong khappud ba dang ïa kajia pud hapdeng ka Meghalaya bad ka Assam, namar ka sorkar Assam na ka por sha ka por kai ju wan rah ïa ki kam pynroi kaba la thikna ba ka dei ka buit tang ban ïoh ban klun ïa ki jaka jong ka Meghalaya bad ka sorkar Meghalaya bad wat ka KHADC kaba dei ban peit ïa ki khyndew ki shyïap ki la shu ïoh thiah lyngngai bad la kut pat tang ha ka jingïaknieh shuki bad klet ïa ka jingeh jong ki paidbah.
“Ka seng ka sngewlyngngoh ruh ba ka KAAC ka la wan tei syndon da ka ïew ha ka Shnong Umlaper ba hap ha ka Raid Nongtung katba ka sorkar Meghalaya bad ka KHADC pat kam don jingtip satia” ong u Samla Amberlight Masharing bad bynrap ruh kumba la paw pyrthei ka jingkwah jongki ban long kita ki nongmihkhmat kam dei satia ba ki sngewkhia ïa ka eh ka shon jong ka jaid bynriew hynrei ka dei tang ka jingkwah ban bat ïa ka bor bad ruh ban myntoi shimet” u la bynrap.
Kumba la paw pyrthei ha KHADC, la ïohi ba kita ki nongmihkhmat ba la jied da ki paidbah ba kin long kita ki nongmihkhmat ban kit khlieh na ka bynta ban ïada ïa ka khyndew ka shyïap bad phewse ynda la poi ha ka shuki pat ki klet ïa ka kam ba la bynshet da u paidbah bad ki la kut tang ha ka jingïakieh shuki ne ban pynkylla ha ka liang ka jingsynshar kumba la paw pyrthei ha KHADC, ong u samla Amberlight Masharing.
U la bynrap ruh da kaba ong, ba kaba kham sngewsih shuh shuh ka dei ka jingshah ñion beit ki paidbah ha ki Shnong khappud khlem ka roi ka par bad lada ki kwah ban kren ïa ka jingshisha ruh kim nud satia ba ka don ka jingbym shngaiñ ha ka leit ka wan ba ki don kita ki Langiong bad kaba sngewkhia pat ba katba dang mih ki sngi ka Assam ka pyni da ka kam bad katba ka sorkar Meghalaya ne wat ka KHADC ruh ka shu ïoh thiah lyngngai khlem da leh ei ei ïa ka bor ne ka iktiar ba la ai da u paidbah.
“Lada long ha kane ka rukom shaei ka poi ka jaid bynriew Khasi ne ki khyndew ki shyïap jong ka jylla Meghalaya bad la paw pyrthei ruh ba lada ka sorkar Assam ka wan rah kino kino ki kam pynroi kam ju don kano kano ka jingpynthud na ka liang ka sorkar Meghalaya bad lada wan rah kam pynroi pat ka sorkar Meghalaya la thikna ban shah pynpra kumba la paw pyrthei ba wat ka skul pule ki heprit ruh kaba thmu ban saindur na ka bynta ka lawei ki heprit ka sorkar Assam kam map satia bad ka kloi ban pynpra kumba la jia ha ka Shnong Khliehumwang bad Madan Umwang ba hap ha ka Raid Nongtung” la ong u samla Amberlight Masharing.
Da kaba bynrap ba kum ka seng ka sngewkhia ba katba dang mih ki sngi kiba bun ki jaka jong ka jylla la shah klun ha ka Assam, ka RBSU ka dawa naduh ka sorkar jylla ba la lamkhmat dau Conrad K. Sangma kum u Myntri Rangbah bad ruh ka KHADC ba ki dei ban shim khia ruh wat ïa ki kam pud ki kam sam bad ym ban kut tang ha ka jingïaknieh shuki, namar lada ka sorkar Meghalaya bad ka KHADC kim kyndit bynriew kan poi ka por ba baroh ki jaka ha khappud ka Meghalaya khlem artatien kan leit lut sha ka Assam ba kitei ki kam pynroi ba la wan rah da ka Assam ki la long lypa ki sakhi ba kitei ki jaka ki hap sha ka jylla Assam, la bynrap u Samla Amberlight Masharing kum u Nongïalam ka Ri Bhoi Students Union na Ri Bhoi District.