Press "Enter" to skip to content

Yn ïaid shakhmat ka UDF ban thaw ïa ka EC ha KHADC

Shillong, 24 Naiwieng: Ka United Democratic Front (UDF) ha ka jingïalam u Bah Latiplang Kharkongor kum u Chief Executive Member kan ïaid sha khmat ban thaw noh ïa ka Executive Committee ha ka Ing Dorbar Thaw-ain ka Khasi Hills AutonomousDistrict Council (KHADC) ha ki shi sngi lane ar sngi.
Hadien ba ki khubor ki la pynpaw ba u Lat ka Jylla, u Tathagata Roy, u la kyntait ïa ka jingai jingmut ka sorkar ban pynjari da ka jing-synshar Administrator ha KHADC bad kdew ruh ba u la phah jingthoh ruh sha ka sorkar ban ai jing-ithuh ïa u Bah Latiplang Kharkongor kum u CEM ba thymmai.
Kum ban shu kdew ba ka sorkar Meghalaya Democratic Alliance (MDA) ba lam khmat da ka National People’s Party (NPP) kum ban  tuklar ïa ki kynrum kynram ha KHADC ka la phah jingai jingmut sha u Lat ba un pynjari da ka jing-synshar Administrator ha KHADC hynrei u Lat u la kyntaid ïa kane ka jingai jingmut.
Kane ka jingai jingmut ka la long jia hadien ba ka KHADC ka la sakhi shwa ïa ka jingshah pyn-khyllem ka Executive Committee ba lam khmat da u Bah Teinwell Dkhar kum u CEM hadien ka jingïathep vote ban kyrshan ne pyrshah ïa ka No Confidence Motion ba la wanrah da Nongïalam ka Liang Pyrshah, u Bah Lamphrang Blah, MDC ka Congress na Mawphlang- Diengiei myn ha ka 20 tarik u Naiwieng.
Ha ka jingaïatai ïa ka mat bym don jingshaniah shuh (No Confidence Motion) ba la wanrah da ka Liang Pyrshah ryngkat ki jingkynnoh ba ka EC ha ka jing-ïalam u Bah Teinwell Dkhar ka la phiel ha ki bun bynta. Na ka Liang Synshar bad u Bah Teinwell Dkharkum u CEM, ki la pyrshang ïada katba ki lah ban ïada bad kyntu ruh ïa u nongïalam ka Liang Pyrshah ban weng noh ïa ka NC.
Da ka jingkyntait u Bah Blah ban weng noh ïa ka NC, u Chairman ka Ing Dorbar Thaw-ain KHADC, u Bah Pynshngain N Syiem u khot pynlong da ka jingïathep vote ban peit katno ngut ki dkhot ki kyrshan ne pyrshah ïa ka NC. Hynrei hadien ka jingthep vote, ka Liang Pyrshah bad Liang Synshar ki la ïa khaid da mar 14 vote.
Kumta u Bah Pynshngain N Syiem, kum u Chairman, u la shim bynta ban thep vote katkum ki kyndon bad u la ai ïa a vote jong u ban kyrshan ïa NC bad kane ka jingleh u Bah Pynshngain ka la pynkhyllem ïa ka EC u Bah Teinwell Dkhar da ka vote result long 15 ngut kiba kyrshan ïa ka NC bad 14 ngut kiba pyrshah.
Mar mar u Ba Pynshngain u la pynbna ba EC hapoh ka United Democratic Alliance (UDA) ba lam khmat da ka United Democratic Party (UDP ) ka la khyllem noh bad buh tarik ruh ban pynlong ïa ka elekshon jied CEM ha ka 22 tarik u Naiiweng, 2019.
Ha ka sngi ba bud kata ha ka 21 tarik, ka kynhun ki MDC ha ka UDF ba thymmai ki la tyrwa ïa ka kyrteng u Bah Latiplang Kharkongor kum u kyrtong CEM katba ka UDA pat ka dang shaniah ha u Bah Teinwell Dkhar..
Hynrei ka drama kam shym la kut tang katne, ha ka sngi ba bud ban thep vote ban jied CEM, u kyrtong ka UDA u bah Teinwell u la weng noh ïalade ha ka minit ba khatduh shwa ban thep vote ïa kaba u la ai jingtip sha u Chairman u bym shym la pdiang shuh pat ïa kane ka jingpyntip. U la hukum baka jingthep vote kan ïaid sha khmat bad baroh ki MDC naka UDF ki la thep ïa ki vote ban kyrshan ïa u Bah Latiplang.
Katba na ka liang ki MDC ka UDA pat kim shym la wan shuh ban ïa shim bynta ban thep vote bad u Bah Latiplang u la jop da 15 la 0 bad shimti ïa ka shuki CEM. Na ka liang ki MDC ka UDA, hadien kane ki la her sha Secretariat ban leit ujor ha u Bah Prestone Tynsong, Symbud Myntri Rangbah ka Jylla ba u Bah Pynshngain N Syiem u la niew shiliang khmat ïa ki.
Kum ban shu kdew ba ka UDA ka dei ka Alliance kaba lam khmat da ka UDP (7 ngut ki MDC lem bad u MDC shu sieh), ha ka jingsynrop lang ka NPP (4 ngut ki MDC), HSPDP (2 ngut ki MDC) bad u wei u MDC shimet. Katba ka UDF pat ka don ïa ka jingkyrshan na 9 ngut ki MDC Congress, 3 ngut ki MDC na ka NPP, 2 ngut ki MDC shimet bad 1 na ka PDF.
Lait na u Bah Pynshngain kum u Chairman, u Bah Alvin S Sawkmie kum u Deputy Chairman ba baroh ki MDC bad u Bah Latiplang Kharkongor kum u CEM, na ki 12 ngut ki MDC pat 10 ngut kiwei pat kiba kyrshan ïa ka UDF kin ioh ban bat ïa ki shuki EM bad katkum ka jingtip 2 ngut ki MDC Congress kin len lade bad kin nym shim shuki EM ban pynskhem ïa ka EC.
Ki ba la thikna ban bat shuki EM ki long ka MDC na ka PDF, ka kong Grace Mary Kharpuri lem bad 8 ngut na ka Congress kiba dang ïa pyrkhat bad rai mano ban bym shim shuki EM.