Press "Enter" to skip to content

Krad u MDC Congress ka Mairang sha ktem ka UDA

Shillong, Nogprah 06: Ka United Democratic Alliance ( UDA) ka kynhun ki MDC ha ka jing-ialam u Bah Teinwell Dkhar kum u Chairman ka la pdiang burom ia ka jingwan ai jingkyrshan u MDC ka Congress, u Bah Batskhem Ryntathiang, uba la iehnoh ia ka kynhun ki MDC ha ka United Democratic Forum ha ka janmiet sngi thohdieng.
U Bah Batskhem Ryntathiang, MDC na Mairang kyndit kynsan shwa ka jingleit ai jingkyrshan ia ka UDA, u la wan ia kynduh ia ki nongthoh khubor ha Shillong Press Club bad pynbna ba u la weng noh ïalade na ka kynhun UPF ba lam khmat da u Bah Latiplang Kharkongor kum u CEM ka Executive Committee ka KHADC ba mynta.
Da kaba pynpaw ba um lah shah shuh bad ym sngew hun shuh ka mynsiem ba un shu peitkai ia ka jingiaknieh bor bad ia ka jingjot jong ka Ri bad ka jaidbynriew, u la ong, “Ym don ba lah ban pynbor ia nga halor kane ka rai, la ka long da ka bor pisa ne da ka shuki namar nga la pynshong nongrim bha ia ka jinglong jingman ka Council”.
U la ong, “Ngan nym treh ban long EM ha kine ki san snem. Ki kam jong ka Council kim iaid shuh namar la shu bunkam ha ka khroh briew bad beh tang ia ka shuki, ki CEM ruh ha ka san snem ki wan haduh 5-6 ngut”.
Da kaba ïaroh ia ka Executive Committee barim bad khamtam ia u Bah Paul Lyngdoh, EM barim, u la ong, “Nga la shim ia ka rai ba lada nga hap ban kyrshan ia kane ka EC kaba rim bad ban jied CEM ngan thep vote khatduh na ka bynta kane ka san snem bad lait nangta ngan nym thep vote CEM shuh ngan ieng beit marwei.”
“Kum ki briew ki don ia ki jingduna hangne hangtai, hynrei katba kot la ka bor ki la pyrshang ban leh ia kaba dei tam”, la ong u Bah Batskhem Ryntathiang.
“Nga ai ka burom khamtam ia u Bah Paul Lyngdoh uba la trei shitom haduh ban pynlong ia ki nongkhaïi bar jylla ban wan pyndem hakhmat ka KHADC. Nga sngewsih ban tip haba khyllem ka EC barim, ki dkhar ki ia bam mithai bad ki ia risa, namar ba une u shiah uba thar ia ki la lait noh mynta,” u la ong shuh shuh.
U Bah Batskhem u la pynpaw ruh ia ka jingbynniaw ba ha KHADC ki MDC ki ia don para Khasi, hynrei ka don tang ka jingialeh pyrshah. “Shaei ka lawei ka ri bad ka jaidbynriew, lada ka jingialeh ka ka long para ma ngi, mano pat ban iada ia ka jaidbynriew,” u la buh jingkylli ryngkat bad ka jaw ummat.
U la ong ba kane ka EC ba thymmai tang ban ioh ia ki EM ruh ka hap ban mudui shaduh High Court. “Hato kata ka jingiakhun jong ngi ka dei na ka bynta ka jaidbynriew ne na ka bynta ka bor ia lajong”.
“Nga kyntu ba nangne shakhamt ia ki paralok jong ngi ha district council ba don tang para Khasi suda haba ngi iohi ia ki jingbakla jingduna to ngin ia tei namar ban pynkhyllem ia ka EC na ka por sha ka por ka la ijah burom,” ong shuh shuh u MDC ka Mairang.
Haba kylli, u la ong, “Hooid nga don ka jingbabe ba nga donkti ban pyn-khyllem ia ka EC barim namar ha kato ka por ngam shym la poi pyrkhat, hynrei hadien ba la dep ban khyllem nga sngew ba nga la bakla namar nga pyrkhat ia ki kam ba ka EC barim ka la leh katba lah ka bor.”
Haba kylli shuh shuh, u la ong ba u dang dei beit u MDC jong ka seng Congress bad u burom ruh ia ka party ka bala pynjop ia u.
“Ngam ieng pyrshah ia ka party Congress bad ngan iai long hi u briew ka Congress bad kam don ka aiñ kaba khang ba u Congrwess um lah ban ied ia ka jaidbynriew,” la ong u Bah Batskhem.
Ynda katto katne por hadien ka jingia-kynduh ha Shillong Press Club ha kaba la wan synran lang ruh da u MDC ka UDP na Mawthadraishan, u Bah Jambor War bad u MDC ka HSPDP na Sohïong, u Bah Sherbor Mawlong, une u MDC ka Mairang u la leit ban ai ka jingkyrshan noh ia ka UDA.
Ia u Bah Batskhem la pdiang burom da u Bah Teinwell Dkhar ha ka jingiadonlang ki MDC ka UDA. U Bah Pynïaid Sing Syiem, Secretary ka UDA, u la ai khublei ia u Bah Batskhem Ryntathiang da kaba ong ba ki nong Mairang ki donbok ban ïoh palat ban ïoh kum ia une u MDC uba la rai rangbah bad ka jingwan ai jingkyrshan jong u ka pynlong ia ka UDA ban kan bun paid.
Na ka liang u Bah Titos W Chyne, u la ong, “Ngi la don 15 mynta bad u CEM mynta u dei ban sngewthuh mynta ba kim don shuh ka jingbun paid bad lait na u Chairman ki don sa tang 13 ngut ha ka Ïng Dorbar Thaw-aiñ KHADC. Kin dang don shuh ki MDC na ka UDF ki ban wan sha ka UDA”.