Press "Enter" to skip to content

Pynbna ka NESO ïa ka jingïakhih ha NE ha ka 10 tarik ban pyrshah CAB

Lah ki Nong India ne ki Phetwir, kylli ïa u PM bad HM
Shillong, Nohprah 06: Ka North East Students Organisation (NESO) kala pynbna ba kan pynlong ïa ka jingïakhih haka 10 tarik Nohprah ha baroh ki Jylla jong ka thaiñ Shatei Lam Mihngi ka Ri, ban pynpaw ïa ka jingpyrshah halor ka jing thmu jong ka Sorkar India ban pynlong aiñ ïa ka Citizenship ( Amendment) Bill (CAB).
Ka seng Khasi Students Union (KSU) kaba dei kawei na ki kynhun ba iadonlang ha ka NESO, kala kyntu ïa ki paidbah ka Bri u Hyniewtrep ba kin ïasnohkti lang ha kane ka jingïakhih jong ka NESO ka ban neh 11 kynta ha kane ka sngi (10 tarik) da kaba khang ïa ki dukan, sangeh ka leit trei leit ktah bad ban ym niah kali.
Ka NESO kala shim ïa kane ka rai ha ka jingïalang ba long hynne ka sngi thohdieng ha Guwahati bad kala rai ruh ban phah ïaka dorkhas sha u Myntri Rangbah Duh ka Ri u Narendra Modi bad u Myntri kam Pohïing u Amit Shah kaba buh jingkylli ïa ki “Hato ka Sorkar India ka dei na ka bynta ki Nongshongshnong lajong ne jong ki poi-wir ba be-aiñ”. Ïa kane ka dorkhas la phah hi hynne ka janmiet sha kine ki Nongïalam ka Ri.
Kat kum ka dorkhas bala soi da u Chairman Bah Samuel B Jyrwa bad u Secretary General u Sinam Prakash Singh, ka NESO kala pynpaw ïa ka jingpyrshah kaba jur ïa ka jingmynjur jong ka Kynhun Myntri ka Sorkar Pdeng ïa ka Citizenship Amendment Bill, 2019, kaba plie lynti ban kheiñ nongshongshnong ka Ri ïa baroh ki poi-wir na Bangladesh, kiba dei ki paid Hindu, Sikh, Buddhist, Jain, Parsi bad ki Khristan, kiba la rung sha India tad haduh ka 31 tarik Nohprah 2014.
Haba pynpaw ba ka Sorkar India ka tip bha ba ki nongshongshnong ka thaiñ Shatei Lam Mihngi ki pyrshah jur ïa ka Bill naba ki paid riewlum ka thaiñ ki dei kiba rit paid ha ki Jylla bapher bapher ka thaiñ, ka NESO kala ong “Ka thaiñ ka don ïa u khappud uba jrong haduh 1741 Km bad ka Ri Bangladesh… ka thaiñ ka la mad ïa ki jingeh na ka jingrung tuh ki poi-wir naduh u snem 1974 na ka daw ka jingïaphiah ri ha ka por ba ïoh laitluid ka India bad ruh ha ka thma ïakhun laitluid ka Bangladesh ha u snem 1971”.
“Ka jingrung tuh ki poi-wir kala pynkylla rit paid ïa ki riewlum ka Jylla Tripura haal ka jong ka jaka bad mynta ka jingdon jong ki paid riewlum hangne kala kot satang 30%” ong ka NESO haba bynrap “Ha Assam, na ki 24 tylli ki District ka Jylla, ki paid riewlum ka Assam kila kylla rit paid ha ki 11 tylli ki District “.
Ka NESO ka pyntip sha kine ki Nongïalam ka Ri ba ha manla ki Jylla ka thaiñ, kala don ka jingialeh pyrshah ïa ka jingrung kyrthep ki poi-wir hynrei kine ki poi-wir na Bangladesh ki dang ïai bteng ban wan rung haduh mynta. Ka ong ruh ba ka Amendment jong ka CAB kala pynkheiñ ruh ïa ki kyndon jong ka Assam Accord.
“Ka NESO ka kwah ban kylli ïa ka Sorkar India, la ka Sorkar India ka dei na ka bynta ki nongshongshnong lajong ne na ka bynta ki poi-wir be-aiñ” ong ka dorkhas haba bynrap “Na ka rukom leh bad ka sienjam jong ka Sorkar India, ka pyni shai ba ka Sorkar India ka ieng na ka bynta ki poi-wir ba be-aiñ”.
Ka NESO ka ong ba ha ka jingshisha, ka kamram jong ka Sorkar ka long ban ai jingiada ïala ki jong ki nongshong shnong hynrei lyngba kane ka Amendment, ha ka jaka ban pynphai pat ïa ki, ka Sorkar India ka pynshlur pynban ïa ka jingrung be-aiñ da kaba kheiñ Nongshongshnong ba pura ïa ki.
Kat kum ka dorkhas, ka NESO kala ong ba kane ka sienjam jong ka Sorkar India kan nang pynshlur ban rung ki briew na Bangladesh khamtam ki Hindu kiba don paid haduh 140 lak tam. Ka ong ba kane ka kam shet shukor jong ka Sorkar India ka dei ka jingma kaba khraw ïa ka snap ba kyrpang bad ka jingneh jingsah jong ki paid riewlum ka thaiñ.