Press "Enter" to skip to content

Shah siat ïap baroh 4 ngut ki nongleh be-ijot ïa ka Doktor, shad kmen ki paidbah

Hyderabad: Baroh saw ngut ki runar kiba la shah kynnoh ba ki leh beijot ka Doktor Veterinary ha Hyderabad ha ka 27 tarik mynta u bnai, ki la shah siat ïap ha ka jingïakhun bad ki Pulit.
Kane ka la jia ha ka sngi thohdieng mynstep por 3 baje, ha ka por ba ki Pulit ki la ïalam ïa kine baroh saw ngut ki runar sha ka jaka ba ki la leh ïa ka kam bymman ban lap ïa ki jingshisha. Ki Pulit Hyderabad, ki la ïathuh ba katba ki dang ïalam ïa kine baroh saw ngut sha katei jaka, kaba dei ha khrum jong ka jingkieng ka surok National Highway, kynsan kynsan ki la knieh kynthet ïa ka suloi jong ki Pulit bad phet na katei ka jaka. Hynrei na ka liang ki Pulit ki la beh bad phah ïa ki ban pyndem, pynban kine ki runar ki la siat ïa ki Pulit. Na ka liang ki Pulit ruh ki la siat kylla sha ki bad ha ka jingïakhun kaba la neh shiphew minit, baroh saw ngut kine ki dakaid ki la kyllon ïap. Kine ki saw ngut ki long u Mohammed Arif (26), Jollu Shiva (20), Jollu Naveen (20) bad u Chintakunta Chennakeshavulu (20).
Ki paidbah kiba la tip ïa kane ka jingjia, ki la ïatuid sha katei jaka bad ki la shad kmen namar ka jingshah siat ïa kine ki nongleh beijot. Ki paidbah ki la ber syntiew ïa ki Pulit katba ki dang ïaid lynti. Nangta don ruh kiba la bah ïa ki tyrpeng katba kiwei pat ki dang pynbam mithai. Kane ka jingleh kmen ka la jia ruh ha kylleng ki jaka ka ri India, ha kaba ki paidbah ki la tem ïa ki ksing bad thang bom pataka.
Ym tang ki paidbah kiba la kmen, hynrei ki don ruh ki MP, khamtam ki kynthei kiba la kyrshan ïa kane ka jingleh ki Pulit, da kaba ong ba kine ki runar kidei hok ban ïap kumne. Hynrei kidon ruh ki riewpawkhmat bad ki MP ruh kiba ong ba ki Pulit kim dei ban shim ïa ka aiñ ha ka kti bad ka aiñ kadei ban bishar ïa ki.
Kane ka Doktor ka la shah leh bei ijot ha kitei ki saw ngut, haba ki la rahbor ïa ka, hadien ba ki la pyllait lyer ïa ka shaka jong ka Scooter bad tyrwa ban ïarap pynshna. Pynban ki la rahbor ïa ka sha khrum jingkieng, ha kaba ki la pyndih kyiad shuwa bad leh beijot bad thang im syndon ïa ka.