Press "Enter" to skip to content

Bamduh ka ding ïa ka kudam ha Iewduh

Shillong, Nohprah 07: Ha ka jingjia pluhding, kawei ka kudam ha Khlieh Iewduh kaba don marjan bad ka Parking Lot jong ka MUDA, kala shah bamduh ha ka ding hynne ka sngi saitjaiñ.
Ki Pulit ki pyntip ba kane ka jingpluh ding ka lah ban jia na ka jingpur ki thylliej ding na ka jaka thang niut kaba don marjan bad kane ka kudam. Hynrei ki ong ba ka jingtohkit mynta ka dang ïaid shakhmat ban pynthikna ïa ka daw.
Kat kum ka jingong jong u, palat 7 tylli ki kali pynlip ding kila poi ha kane ka jaka ban tem ïa ki thylliej ding, ba kin lait na ka jingpur sha ki dukan kiba don marjan.
“Ki Pulit pynlip ding kila shimpor haduh lai kynta ban lah pynlip ïa ka ding” ong ki Pulit kiba ïathuh ba ym shym la don mano mano ba mynsaw ha kane ka jingjia.
Ki paidbah ba sakhi ïa kane ka jingpluh, kila ong ba dei da ka jingwan poi kloi jong ki Pulit bad ki Pulit pynlip ding ba la lah ban pynlip ïa ka ding shuwa ba kan pur sha kiwei pat ki dukan bad ki kudam ba marjan.
Ha kawei pat ka jingjia, ka ding kala bamduh ïa kawei ka kudam jong ka Bonded Ware House jong ka Megna Marak kaba don ha Ri-lbong. Kane ka jingjia kala jia hynnin shiteng miet. Ki Pulit ki pyntip ba haduh artylli ki kali pynlip ding kila poi ha kane ka jaka bad kila lah ban pynlip ïa ka ding. Kat kum ka jingong ki trai, ka jinglut jingsep ha kane ka jingjia kala kot kumba T. 1 klur eiei.