Press "Enter" to skip to content

Dawa ka CoMSO ïa u Lat ka Jylla ban shon muhor noh ïa ka MRSSA, 2019

U Lat u dei ban burom ïa ka sur ki paidbah
Shillong, Nohprah, 07: Ka Confederation of Meghalaya Social Organisation (CoMSO) ka la dawa ïa u Lat ka Jylla u Tathagata Roy ba u dei ban ai jingmynjur noh ïa ka Meghalaya Resident Safety and Security Act, 2019 Amendment Ordinance 2019 ka Aiñ kaba don ïa ki bor bad ka itiar jong ka ILP hynrei lym kumta kam banse ban pynlong da ki jingïakhih.
“Ngi la dep ai da ka jingthoh bad ngi ladep ïakynduh ïa u Lat, hynrei haduh mynta um pat ai satia ïa ka jingmynjur. Lada u dang ïai pynslem, ka la don ka prokram naduh ka lah sngi u Blei jong ka taiew ban wan, ban pyrshah ïa ka Citizenship (Amendment) Bill bad pyrshah ïa u Lat,” ong u Chairman jong ka CoMSO u Samla Robert June Kharjahrin ha ka jingïakren bad ki lad pathai khubor mynta ka sngi saitjaiñ.
Haba kynthoh ïa ka jingpynslem jong u Lat ban ai jingmynjur ïa kane ka aiñ ba ka Kynhun Myntri jong ka Sorkar Jylla dang shen ka la wanrah ïa ka jingpynbeit thymmai, u Samla Robert u la ong, “lada ki Nongmihkhmat kiba ngi ladep jied ki la ai ka jingmynjur,
u dei uei ma u (Tathagata Roy) ban bat. Kane ka dei ka ri synshar paidbah. Ïa u (Tathagata Roy) ngi khlem jied bad ïa u la shu phah da ka Sorkar India bad da u President. U (Tathagata Roy) dei ban burom ïa ka jingsngew jong ngi haba u don ha kane ka Jylla riewlum. U (Tathagata Roy) dei ban long ka sur jong ngi ki ritpaid. Ngi khlem ban wanrah ïa u hangne, u dei uba shu wan hi. Kata ngi dei ban sngewthuh ïa ka jingshisha.”
Haba kylli une u nongïalam ka CoMSO u la ong, “Ngi shu kyrpad ïa u Lat ka Jylla ba u dei ban burom ïa ka synshar paidbah ïa kaba ngi ladep jied ïa ki MLA katkum ka riti synshar jong ka ri.”
“U Myntri Rangbah, u Symbud Myntri Rangbah bad ki Myntri Sorkar baroh ki da jop ïa ka elekshon. Ki jop ïa ka elekshon namarba ki la kular ban ïada ïa ka ri bad ïa ka jaidbynriew. Ym don uwei ruh na ki Myntri Sorkar uba ong ba lada jop un ong ba un pynjot ïa ka jaidbynriew. U Lat u dei uei ban shu pynsangeh ïa ki (ïa ka rai jong ka Kynhun Myntri) bad ïa ka sur jong kiba bun. U Lat u dei ban sngewthuh ïa ka jingsngew jong ngi da kaba mynjur ïa ka Meghalaya Residents Safety and Security Act, 2019,” la bynrap shuh shuh une u nongïalam ka CoMSO.
Haba pynshai halor kane ka Meghalaya Residents Safety and Security Act, 2019, u Samla Robert u la ong, “Wat ka Eastern Bengal Frontier Regulation Act ruh kam mana ïa u briew ba un leit na kawei ka jylla sha kawei pat ka jylla, hynrei ka teh kyndon. Ngi dei ban sngewthush bha hapdeng ka jingmut jong ka jingmana (Prohibition) bad ka jingteh kyndon (Regulation).”
“Kane ka aiñ ka ïasyriem thik kum ka Visa lada ngi leit sha kiwei pat ki ri. Ka Visa ka dei ka lynti ba don bad ki jingteh kyndon kaba mut ba ngin hap ban rejistar kyrteng. Lada ngi leit sha ki Jylla kiba la don ïa ka Inner Line Permit, ngi hap ba aplai bad ban rejistar kyrteng ïalade bad ngi da hap ruh ban ïathuh katno sngi sngin sah bad ban leh aiu. Bad lada phi la lah ban pynshisha ba phi dei u Nong India kim lah ban khang,” la pynshai u Samla Robert halor ka jingthmu ban pyntreikam jong ka Sorkar Jylla ïa ka MRSSA, 2019.
“Ha ka MRSSA ruh ki briew kiba wan nabar kin hap ban pyndap ïa ka Form. Kaba donkam eh ka long ba ki dei ban rejistar kyrteng ïa lade. Nalor kata, ki (bor sorkar) dei ban lum thup ïa ki kyrteng ha ka rejistar khnang ban tip u briew uba wan nabar u sah haei, u wan leh aiu. Kata ka dei ka jingmut haba pynrung kyrteng bad ynda ladep pynrung kyrteng yn sa lah ban ai ïa ka Pass ba u briew uba nabar un wan da ka jingtip jong ngi,” la ong shuh shuh une u Chairman ka CoMSO.